ORANJESTAD,Aruba
Aruba Hotel & Tourism Association (AHATA) su asamblea general di Januari a inclui orador internacional, experto den biahe y turismo sostenibel, Sr. Doug Lansky. E tema di su presentacion tabata: Turismo Balansa.
Doug Lansky a presenta puntonan di enfoke pa por tin exito duradero den turismo y a reta sector priva y gobierno pa tuma decision cu ta sigura turismo balansa. El a defini futuro exito den turismo como un combinacion di esfuerso pa: proteha calidad di bida di e residentenan, maximalisa e impacto economico local, eleva e experiencia di e bishitante y proteha nos recursonan unico.
Durante su presentacion el a enfatisa cu nos tur mester pensa riba termino largo, cu curashi y resposabilidad pa por tin un economia sostenibel exitoso y un comunidad den harmonia.
Aruba tin hopi exito y potencial, pero mester tuma decision dificil pa drecha e cosnan cu ta causa daño na nos recursonan natural. Ademas Doug Lansky ta sugeri pa maneha e fluho di cantidad di persona pa por ofrece experiencia autentico na nos bishitantenan. E la splika cu e palabra “overtourism” no ta corecto, pasobra e desafio ta na cierto luga y na cierto momento y no na tur luga na tur momento. Pa tal motibo e ta prefera pa identifica e problema cu mester di atencion como “unbalanced tourism”.
E presentacion a inclui efecto di ‘Flight Shame’ riba turismo y impacto di turismo crucero na un destinacion.
Na final di e presentacion miembronan por a haci pregunta na Sr. Lansky y e asamblea a culmina cu un momento di network pa intercambia reaccion y idea. AHATA ta gradici anfitrion: Aruba Marriott Resort & Stellaris Casino y sponsor: KLM.
Tocante Doug Lansky:
Doug Lansky ta un autor, orador aclama y un lider den turismo sostenibel, innovacion, tendencianan y desaroyo di destinonan. El a biaha pa mas di 120 pais. E ta autor di 10 buki. Ademas, tabata anfitrion di un programa na Travel Channel y tabata coresponsal p’e programa Savvy Traveler di Public Radio.
