Fundacion mi Voz ta bo Voz , comision nacional di abuso di mucha y gobierno di Aruba tin algun dia di conscientisacion y prevencion di abuso di mucha. Drs Melva Croes Yanez cu ta un Neuropsycholoog cu tabata presente y ta un di e prome oradornan na MFA noord riba e topico di abuso di mucha.
E prome anochi tabata diahuebs ultimo y a enfoca riba e topico di kico por pasa cerca di e mucha na momento cu e ta keda abusa. Sea ta abusa emocionalmente of abuso sexual infantil. Segun Neuropsycholoog Drs Melva Croes Yanez organisacion mundial di salud ta duna di conoce cu participacion di un mucha cu ta un persona menor di 18 aña na un actividad sexual e mucha no ta compronde plenamente kico ta pasando cu ne.
Esaki ta un punto cu e organisacion internacional ta kere den dje. Tambe e mucha cu ta keda abusa no por duna su conocemento of cu esaki ta un acto cu ta viola leynan of abuso social den un sociedad. Segun e estudionan internacional di abuso sexual infantil ta mira cu mundialmente e cantidad di porcentahe di mucha muhe ta un tiki mas dobel cu mucha homber. E porcentahe cu ta wordo duna den diferente estudionan ta bisa cu e mucha muhe ta 16% ta keda viola mas hopi cu e mucha homber cu ta na 7.6%.
Sinembargo na Aruba cifranan ta varia un poco. Pero loke cu ta un realidad e mucha muhenan ta keda viola mas hopi cu e mucha homber nan riba e tereno di abuso sexual infantil.
Drs Melva Croes Yanez tambe a elabora riba e impactonan corto y a largo plaso di salud y bienestar fisico di e mucha na momento cu e keda abusa. Tambe mester tene cuenta cu negligencia y negligencia emocional tambe ta un abuso. E impactonan ta hopi grandi y por mira esaki den practica unda cu ta mira cu e muchanan cu ta keda abusa por bay actua diferente na scol. Tur esaki ta bandera cora cu e docente mester por capta pa por yuda e mucha ora cu tin e cambio den e conducta di e mucha.
Segun Drs Melva Croes Yanez hopi biaha e mucha no ta papia na momento cu nan ta keda abusa, mas ainda ora nan ta wordo abuso door di un miembro di famia mes. Hopi biaha na momento cu e mucha bira un adulto e momento ey e ta cuminsa expresa y papia riba su abuso. Esaki ta e motibo tambe cu hopi biaha e abuso nan ta keda scondi y e hende nan no ta bin dilanti , pero te na momento cu ta laat of ora cu ya caba e persona ta sufri problemanan traumatico y of depresion por bin saca afo cu un tempo e lo tabata wordo abusa. Si mester mira bon e impacto na corto plaso y largo plaso tur ta haci un efecto riba e ser humano.
E anochinan di informacion cu ta sigui ta na MFA Paradera dia 18 di April , MFA Savaneta 25 April y MFA St Cruz dia 30 di April. Tur anochi e presentacionnan lo ta diferente di topiconan riba e aspecto sexual. Mundo ta cambiando y norma y balornan tambe ta cambiando, esaki ta trece diferente problema y abuso nan cu ta tuma luga pero ta mira esaki manera ta cosnan normal.
Segun Neuropsycholoog Drs Melva Croes Yanez den nos cultura tin hopi cosnan cu ta cambiando unda cu hopi abuso a cuminsa wordo mira manera ta algo normal esaki ta. Esaki ta conta riba tur tereno di abuso , tanto abuso infantil, pero tambe abuso di hende grandi tambe. E mundo ta bin cu cambionan asina lihe y e hende no ta paga tino riba e abuso nan cu ta tumando luga y ta cuminsa mira e cosnan manera ta normal nan ta siendo cu e no ta normal.
Drs Melva Croes Yanez ta kere cu ta importante pa sigui duna informacion riba e parti di abuso, pero tambe tene na cuenta e cambionan cu ta haya na Aruba door di influencianan di pafo , normanan y balor, cambio di cultura cu ta keda treci riba nos comunidad. Esaki ta conta tambe pa loke ta abuso di hende grandi.
