Fieldad ta un fruta di Spirito Santo, e ta un forma di bida, e ta demostra kico tin den nos, e ta e fundeshi di nos karakter y nos integridad, sin fieldad na Dios tur cos ta cay na awa. Ora nos ta fiel na Dios di mes nos ta fiel na hende, pasobra si no ta asina , nos fieldad ta fake y nos ta biba un bida di mentira.
Pesey hopi hende no ta compronde dicon cos no ta bay bon, pasobra ta imposibel pa gaña Dios pasobra semper e berguensa lo bini pa esun cu ta gaña. Den Galationan 5:22-23 ta para scirbi e frutanan di Spirito Santo, cual nos mester tin den nos bida, pasobra nan ta duna evidencia cu nos ta yiu di Dios, y con nos tin cu trata cu nos prohimo, pero ora nan no ta aparece den nos bida, nos ta demostra cu amor di Dios no ta den nos.
Y e ta algo notable den nos forma di biba , nos actitud, nos forma di papia, nos forma di trata hende, pasobra ora un fruta ta presente, tur ta presenta pasobra e Spirito di Dios ta completa nos bida, y no ta duna nada na mitar. Tur e frutanan ey ta bini di Spirito Santo, asina cu nos tin e Spirito Santo, esey ta su evidencia, pero cada rato cu nos ta demostra otro cos, nos ta mustra falta di presencia di Spirito Santo den nos bida.
E frutanan di Spirito Santo ta: Amor, Goso, Pas, Pasenshi,Cariño,Bondad,Fieldad, Mansedumbre,Dominio Propio,contra e cosnan ey no tin ley.Awor esnan cu ta pertenece na Cristo Hesus, a crucifica e carni y su pasionnan y deseonan. Si nos ta biba segun e Spirito, laga nos cana tambe segun e Spirito.No laga nos bira hende gabado, provocando otro y cudisha otro.(Galationan 22-26).
Awor tur hende por compronde, kico ta e fruta di Spirito, con e ta move , ken tin e, y na unda e ta y na unda e no ta.
Pasobra caminda e frutanan di Spirito Santo no tey presente, constantemente tin gañamente, orguyo,halsamento,tiramento di cos na cara di otro, biba den pasado di otro, competencia, falta di pordon,falta di respet, traicion,gabamento,y no reconoce bondad.
Tur esey ta wordo demostra caminda e Spirito Santo di Dios no ta, pasobra no tin ningun evidencia, y mas peor ainda, ta evita tur manera di menciona nomber di Dios, pa asina no tin compromiso cu Dios.
Imagina bo si bo tin cu traha of biba den un ambiente asina.( Daniel capitulo 6).
Fieldad cual ta un fruta di Spirito Santo ta trece lo siguiente;
Fieldad ta trece bendicion ( 1 Samuel 26:23). Fieldad ta trece un revelacion mas perfecto di Dios( Numbernan 12:6-8) ( 1 Corintionan 4:1-2). Fieldad ta trece proteccion y liberacion ( Salmo 37:28).
Fieldad ta trece bendicion material( 2 Samuel 22:18-27). Fieldad ta trece promocion. ( Mateo 24:45-47) (Mateo 25:21). Fieldad ta hiba nos na escogencia di Dios. ( Mateo 22:14) ( 1Timoteo 1;12) ( 2 Timoteo 2:2). Fieldad ta bini cu su beneficio ( 2 Timoteo 2:13). Dios ta exigi di nos pa nos ta fiel den nos matrimonio.
Dios ta exigi di nos pa nos como mayor ta fiel na nos yiunan.
Si nos no ta fiel na Dios , no tin crecemento den nos bida, tur locual nos por logra ta temporal, pero e
cosnan eterno no tey. Ta cu nos fieldad na Dios nos ta demostra cu nos ta sirbidornan di Dios Todopoderoso.
Fieldad ta un fruta di Spirito Santo, cu ta duna evidencia di Su presencia.
