Movementu Kousa Promé resientemente a trese su opheshonnan kontra e intenshon di gobièrnu di Kòrsou pa instalá den sentro di siudat, den kuadro di Konmemorashon di 160 aña abolishon di sklabitut, e estatua di e “naakte” Tula. Un Tula sunú den sentro di siudat. Bastante persona, organisashon i institushon a sostené e protesta aki.
Kousa Promé no ta keda te na opheshon so. Kousa Promé ta presentá un alternativa pa un estatua di nos érue Tula den Punda.
Movementu Kousa Promé ta proponé un proyekto kultural artístiko emansipadó pa yega na un estatua monumental di Tula den sentro di siudat Punda.
Base di e proyekto “Tula den Punda” ta embolbí pueblo den e proseso pa yega na un estatua ku ta karga aprobashon di pueblo. Un proyekto ku ta duna formashon históriko tokante nos érue Tula. Partisipantenan ta muchanan di skol di fundeshi, hóbennan di skol avansá i pueblo en general.
E parti di formashon lo sosedé a base di un dokumentu di informashon i video ku por usa komo material pa duna lès na alumnonan di skol di fundeshi te skol avansá. Den e lèsnan aki ta para sentral detayenan di e lantamentu i e kòmbersashon entre Tula i pader Schinck ku a tuma lugá na Portomarí. Den e lucha heroiko kontra sòldánan kolonial i e kòmbersashon ku pader Schinck por mira bon kla ki tipo di lider i luchadó Tula tabata. Despues di e lèsnan aki, e alumnonan ta haña tarea pa pinta e kara di Tula. E kara ku nan ta haña ta kuadra ku e lider Tula.
Kada skol lo sòru pa un kuerpo di hurado ku ta evaluá i selektá pintura. E pinturanan ku e huradonan di skol selektá, ta bai huntu ku un relato pa un hurado nashonal di eksperto.
E hurado nashonal ofisial di eksperto lo skohe 30 kara ku lo bai kompañá ku un relato pa tres pintor hóben spesialisá den pintamentu di potrèt. For di e 30 pinturanan kada pintor individual lo traha un kara pa Tula. Na final lo tin tres kara di Tula, unu di kada pintor. Via media sosial, pueblo en general inkluyendo muchanan, alumno i studiante lo vota riba e tres karanan. E proyekto ta kulminá kaminda pueblo ta skohe un di e karanan di Tula. E kara ganadó.
Finalmente lo traha un estatua di Tula di bròns di un altura di 3 meter den sentro di Punda. E estatua aki mester simbolisá Tula komo e lider den akshon den e lucha di 17 ougùstùs 1795. E Tula di 3 meter aki lo tin e kara ku pueblo a skohe. Ta mas ku klaro ku e no por ta sunú.
E tarea “pinta kara” ta un método pa laga mucha i hóbennan penetrá den e idea i historia di Tula. Un intento pa krea identifikashon, embolbimentu i e sentido di pertenensia.. “Laga pueblo vota” tambe ta pa e mesun ophetivo: krea identifikashon, embolbimentu i e sentido di pertenensia.
Movementu Kousa Promé ta ofresé e proyekto “Tula den Punda” na gobièrnu i Parlamentu di Kòrsou den kuadro di Tula komo érue nashonal.
