ORANKESTAD,Aruba
Oficina di Turismo di Aruba (A.T.A.) a introduci un total di tres sector adicional cu tambe lo mester completa e programa di Aruba Health and Happiness Code (HH Code). E tres sectornan adicional ta inclui ‘Taxi’, ‘Car Rentals’ y ‘Tour Operators’. A.T.A. conhuntamente cu Departamento di Salud Publico (D.V.G.), Ministerio di Salubridad y Departamento di Transporte Publico (D.T.P.) a lansa e programa di Aruba Health and Happiness Code (HH Code) cu e meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba.
Durante e prome dos simannan despues cu e programa di HH Code a wordo lansa, un total di 852 compania den e sectornan di ‘Accommodations’, ‘Food & Beverage’, ‘Food Trucks’ y ‘Retail/Shops/Supermarkets’ a exitosamente pasa e prome fase di e programa pa cual nan a wordo otorga un seyo colorido di HH Code, cual ta e seyo di pre-check. Awor e companianan aki lo sigui pa e di dos fase di e programa pa asina obtene e seyo di oro. A.T.A. a introduci tres sector adicional cu tambe lo mester registra pa e programa di HH Code cu e meta pa completa esaki dentro di dos siman, pues no mas tarda cu 19 di juni. E sectornan adicional ta inclui e sectornan di ‘Taxi’, ‘Car Rentals’ y ‘Tour Operators’. Manera tabata e caso cu e cuater sectornan anterior, e sectornan adicional tambe lo mester completa e dos fasenan di e programa di HH Code. E prome fase ta consisti di un registracion y checklist cu lo mester wordo yena via www.arubacovid19.org. Si esaki wordo haci debidamente, e taxista/compania lo ricibi un seyo colorido di pre-check y lo sigui pa e siguiente fase cual ta consisti di un inspeccion. Si resulta cu e taxista/compania ta cumpli cu tur e rekisitonan mandatorio manera stipula, e taxista/compania lo ricibi un aprobacion final y lo wordo otorga un seyo di oro. Ta importante pa remarca cu e uzo di e seyo otorga na cada taxista lo ta diferente compara cu e otro sectornan. Den e sector di ‘Taxi’, cada taxista lo ricibi un seyo den forma di un sticker cu lo ta visibel for di pafo di e vehiculo. Ademas di esaki, cada taxista lo ricibi un ‘hangbord’ cu lo ta visibel paden di e vehiculo. E sticker como tambe e ‘hangbord’ lo wordo registra na e number di auto. Aunke cu tur sector introduci como parti di e programa di HH Code ta contribui na e calidad di e experiencia cu bishitantenan lo tin riba nos isla, e sector di transporte specificamente ta uno cu ta sobresali, mirando cu esunnan cu ta forma parti di e sector aki mayoria biaha ta e prome cara cu nos bishitantenan ta mira na momento cu nan sali for di aeropuerto of puerto di crucero. Sinembargo, e protocol y medidanan inclui den e HH Code ta tene na cuenta e diferente proveedornan cu cual bishitantenan lo por tin contacto durante nan bishita door di cubri tur punto di contacto den e cadena di suministro. Pa e motibo aki, A.T.A. ta haci un apelacion na tur compania cu ta forma parti di e shete sectornan di ‘Accommodations’, ‘Food & Beverage’, ‘Food Trucks’, ‘Retail/Shops/Supermarkets’, ‘Taxi’, ‘Tour Operators’, y ‘Car Rentals’ pa completa e registracion y checklist cu ta pertenece na nan respectivo sector pa asina inicia e proceso pa obtene e seyo di HH Code. Di e forma aki, cada compania ta contribui na eleva e
protocolnan di higiena y salud riba nos isla cu lo haci Aruba un pais mas higienico y limpi pa e biniestar y salud di nos bishitantenan como tambe nos comunidad local.
Pa mas informacion tocante e HH Code y con pa registra por bishita www.arubacovid19.org/ahhc of por manda un email na healthcode@aruba.com.
