Tres persona konosí riba 60 aña a bakuná komo promé na Kompleho Deportivo Jorge Nicolaas kontra corona. Periodista i konosedó di kultura Bòi Antoin, Paulina ‘Mama Smile’ Rodriguez, i dòkter Marian Luinstra-Passchier di Salubridat Públiko, a akudí djaluna mainta tempran na e kompleho di deporte pa nan promé angua di Pfizer. Dos di nan, Antoin i Rodriguez, ta aparesé tambe komo embahador di e bakunashon riba poster ku Entidat Públiko Boneiru ta ekshibí riba medionan sosial i den espasionan públiko. Pa e promé dia di bakunashon, shentitrinta hende riba 60 aña a registrá.
Paulina ‘Mami Smile’ Rodriguez ta bakuná komo ku e tin gana di bai di biahe. Un yu di dje ta den un institushon di kuido spesial na Hulanda. Tur aña Rodriguez ta bai Hulanda pa mira kon ta bai ku su yu. Antoin ta bakuná komo ku e tin gana di bishitá hende grandi atrobe pa su trabou pa Fundashon Históriko Kultural Boneiru, FUHIKUBO. Pa hopi aña kaba, Bòi Antoin ta entrevistá hende grandi na Boneiru pa registrá kultura i historia di e isla akí. Luinstra-Passchier ta bakuná pasobra esaki ta kontribuí na salú i bienestar di tur hende na Boneiru. E ta spera ku otronan riba 60 aña ta sigui su ehèmpel.
E dianan ku ta bini riba djaluna, djamars, djaweps i djabièrnè hendenan riba 60 aña por bakuná na Kompleho Deportivo Jorge Nicolaas. Djárason nan por bai Fundashon Cocari na Rincon. Hendenan riba 60 aña ku no a registrá ainda pa e promé angua di Pfizer por yama 0800 0800 òf registrá online na www.bonairecrisis.com
