E ehersisio Militar Internashonal ‘Très Kolos’ e aña aki a tuma lugá na Aruba. A partisipá na e ehersisio aki ku a dura dos siman (14-25 di òktober), Marinirnan Merikano, Franses i Hulandes; esaki tabata pa reforsá e kolaborashon i a tuma lugá na Kazèrne di Marina na Savaneta.
Très Kolos (tres koló) desde 2010 ta konosí ku e nòmber aki. E tres kolónan ta referí na e kolónan di e bandera di e paisnan ku histórikamente a partisipá.
E ehersisio ta konsistí di un kompetensia militar, den kua e ekiponan di diferente pais ta kompetí kontra otro i un parti ta ehersisionan táktiko i diferente senario. E parti di kompetensia ta kontené komponentenan di ehersisionan di forsa i resistensia, un pista di awa i opstákulo, un pista anfibio, tareanan di tiru i nabegashon.
E parti táktiko ta konsistí di diferente ehersisio ku ta bin dilanti, ku ta inkluí asenso, persiguishon silensioso, i un atake anfibio.
Tur e aktividatnan ku a realisá durante Très Kolos ta aktividatnan partikularmente desafiante. Aki e abilidatnan físiko i mental ta keda ampliamente tratá ku e fin di saka lo mihó di e ekiponan den áreanan di deportividat, koperashon, integrashon i kompetensia. E ophetivo di e ehersisio ta pa konsolidá i ampliá aún mas e integrashon i relashonnan mútuo entre e diferente forsanan armá. Ta trata di ta aún mas mihó prepará pa e tres tareanan prinsipal di Defensa den Region Karibe, tal manera protehé e isla/paisnan Karibense Hulandes i duna yudansa di emergensia durante temporada di pasashi di un orkan.
