Den oranan di atardi un carta, cu tabata iniciativa di partido AVP, a wordo entrega na e representación di Hulanda aki na Aruba, riba L.G. Smith Blvd.
AVP dialuna anochi a yama un reunión grandi pa busca aprobación pa entrega di e carta unda ta bisa Hulanda e preocupación existente na Aruba pa mal gobernación. Den intento pa haci e forsa mas grandi, a acerca diferente líder político pa firma e carta hunto cu nan. Despues di a negociación contenido di e carta aki, e líder di AVP Mike Eman y líder di Accion21 Miguel Mansur, hunto cu algún parlamentario di AVP a bay entrega e carta na VNO. Marisol Lopez Tromp no por tabata presente debi na otro compromisonan.
“Nos ta hunto awe aki pa motibo cu nos tur ta comparti de mesun preocupacion cu tin den nos pais, c’un desempleo creciente, un economia den un situacion sumamente dificil y en bes cu gobierno tuma pasonan pa crea perspectiva pa nos comunidad, na e momentonan aki por mira cu gobierno ta imponiendo mas medida riba nos comunidad,” Eman a bisa prensa para pafo.
Tur informacion necesario ta den e carta y representante di VNO a confirma cu e carta lo sali kisas ayera mes pa Hulanda pero no a sigura cu e lo yega asina lihe cerca Minister Presidente Mark Rutte y pa e proximo reunion di RMR diabierna venidero.
Tin un grupo chikito di simpatisantenan di e partido berde a compaña nan líder pa entrega di e carta aki.
