ORANJESTAD,Aruba
Castigo combina ta loke cu Corte di Husticia den Prome Instancia a pone pa e tres personanan envolvi den e Portofon Gate, caso conoci como Kinikini. Un caso unda un grupo di miembronan di prensa a haci uzo di sistemanan ilegal pa scucha asistencianan policial c uta wordo brinda.Den e prome parti di e caso, a bini dilanti Nelson (Speed) Andrade, Marko Espinoza y e funcionario policial Kenny Thijsen. Nan tur a wordo haya culpabel di soborno y haci uzo den forma ilegal di un portofon, y / of scucha Polis (via un of otro sistema). Nan tambe a haya castigo combina, pero a apela e sentencia cu mester wordo trata ainda door di Hof. E di dos parti di e caso ta contra e periodista R.T. y su ruman L. T., kende no ta periodista, y e funcionario policial Ari Murray. E caso e biaha aki tabata contra e periodista RT, su ruman LT y e funcionario policial AM. E funcionario policial a wordo haya culpabel di malversacion di un radio di polis (horta radio tetra di polis) y soborno (ricibi algo a cambio pa haci algo indebido). Corte un biaha mas a mustra cu loke a haci no ta corecto ni legal. No ta permiti pa scucha asistencia policial. Den e caso di e funcionario policial, el a pone na disposicion di e periodista un radio di polis. Aunke cu e Polis ta nenga di haci esaki, tur prueba, segun sentencia di Corte, ta mustra lo contrario. E propio periodista a declara di a haya e portofon for di un miembro di KPA, pero no kier a divulga e nomber. Tambe a menciona mensahe cu e periodista a manda pa e acusado Murray, unda ta papia di un pago. Durante e investigacion a haya mas cu un radio na cas di e periodista. Sigur dos di e radionan ta relaciona cu e caso di e funcionario policial aki. Hues a bisa e acusado cu e ta “un funcionario policial y cu pueblo mester por tin e confiansa cu e ta ehecuta su trabou cu e debido respet.” E ta un posicion di hopi confiansa y e pueblo ta confia riba un Polis. Corte a bay di acuerdo cu e demanda di Ministerio Publico, cu tabata 6 luna condicional, 2 aña di prueba, 240 ora di trabou pa comunidad of 120 dia cera. Na mesun momento a dicta sentencia den caso di e rumannan Tromp. Pa e periodista, a bisa cu e pruebanan ta suficiente y cu ta rechasa su defensa. No ta permiti pa scucha e combersacionnan policial. A hay’e culpabel di a comete soborno y tapmento di combersacionnan riba radio di polis. A bay di acuerdo cu e demanda di Ministerio Publico, 186 dia di cual 180 dia ta condicional y 3 aña di prueba, 240 ora di trabou pa comunidad of 120 dia cera. Pa su ruman LT, a dicta 180 ora di trabou pa comunidad of 90 dia cera.