Na diferente okashon, Asosashon di restorantnan, CRA, a duna diferente relato pa kual restorantnan na Korsou ta pasando aden. Awor ku nos a enkontra 3 blackout den un siman, laga nos pone tur kos kual a sosede te ku aworaki riba un rei:
Na mart tur negoshi a haña nan mes ta sera nan portanan pa un luna i mei. Lockdown a drenta na vigor. A intodusi NOW pa luna di aprel, kual no a resulta bon pa hopi negoshi. A anunsia ku no mester paga OB i no mester paga e parti di AOV/AWW di dunado di trabou.
Luna di mei nos ta haña nos ku plachi di dia i restorantnan por kuminsa ku delivery i take out, kual pa mayoria no tabata un eksito. Toke de keda a keda implementa.
Na yuni esnan ku tin terasa por habri te ku un maksimo di 25 hende den e restorant. Toke de keda a wordu extende un tiki. Algun restorant a kuminsa nota ku nan no por sobrevivi i a disidi di sera nan porta.
Na yuli a habri frontera. Turistanan por bini Korsou. Esaki a tuma mas ku 3 siman ku por a ripara ku turista a kuminsa bini. Restorantnan “paden” por risibi un maksimo di 25 persona.
Na ougustus toke de keda a wordu ekstende te ku 12 or di anochi pa 5 or di mainta.
Resorantnan ,bou di preshon di CRA, a haña ekstenshon pa bai 50 persona maksimo, of 50% di bo kapasidat te un maksimo di 50 persona. Turistanan ta kuminsa bini for di Oropa i hotelnan ta kuminsa haña algun kamber. Prome kaso di Covid-19 a wordu konstata. Origen no ta konosi.
September kasonan ta kuminsa bira mas. Ta reintrodusi toke de keda pa 11 or di anochi.
Oktober restorantnan ta kuminsa sinti e efekto di e turistanan i ta kuminsa drai miho. Algun di nan no mester a aplika pa NOW.
November e kasonan di Covid-19 ta krese i ta introdusi toke de keda di 9 or di anochi. Restorantnan tin ku sera 8 or.
Belasting ta kuminsa manda “aanslag” di pago pa OB i primanan di aprel, mei ku yuni.
Kasonan ta subi lihe i a introdusi lei seku den desember. Esaki ta pa solamente negoshinan di Horeca. Supermerkadonan por sigi bende alcohol, mientrestantu “fiestanan di kas” ta oumenta.
Hulanda ta marka nos ku kodigo oraño, kanselashon ta drenta mesora pa paketenan di hotel i restorantnan tambe ta haña nan konfronta ku kanselashonan. Areolineanan ta desvia nan buelonan pa Aruba i Boneiru. Mas restorantnan a sera nan porta, algun temporal i algun pa semper. E medidanan lo por krea e efekto di domino, esta algun mas lo sigi.
Blackout total na Korsou, dia 7 di desember. Diferente negoshi no por a habri nan portanan. Despues di algun dia, e sigiente blackout, 3 dia despues di e prome un, esta djaweps 10 di desember. Negoshinan ta keda sera atrobe. Pa kolmo, djasabra 12 di desember, nos ta keda konfronta ku otro blackout. Negoshinan a sera mas tempran, i pa kolmo e blackout aki tin un rekort, pa sierto areanan mas ku 17 ora largu. Diferente restorantnan lo tin ku deshasi di nan stock, kual lo a daña, esta otro sla. Awor mas ku nunca e TVL (Toeslag Vaste Lasten) ku minister a meshona, mester bin urgente i na desember aki mes!
Desember ta e luna mas miho pa tur restorantnan, kaminda ta haña oportunidat di traha riba bo reserva pa e sigiente lunanan. E aña aki, esaki ta e luna ku ta marka ku benta di mas abou, ku eksepshon di aprel kaminda tur negoshi tabata sera.
Tin ku menshona, ku sifranan a prueba ku te ku dia 6 di november, transmishon di e virus den HORECA tabata solamente 1%. Por dedusi di esaki ku restorantnan ta e luga mas seif ku por bai!
Nos falta algun siman. Pasku ta dilanti porta, i nos ta spera ku e restorantnan lo por haña un alivio pa e sobra dianan ku a sobra. Despensashon di lei seku, i toke de keda te ku 11 or lo ta un yudansa. Dia 14 di desember lo evalua i nos ta spera ku ta tuma esaki na konsiderashon.
Nos hendenan local nos ta pidi pa sostene bo restorant faborito. Bai kome einan of kumpra un giftcard ku por usa pa regala pa pasku. Tur yudansa awor ta bon bini. Sigur si bo no ke perde bo luga preferi!
