Trayekto di Formashon Sosial (Sociaal Vormings Traject-SVT) di Aruba i Kòrsou huntu a finalisá nan fase militar na Kòrsou. E dianan ku ta tras di lomba tabata den e enfoke di aktividatnan intensivo, ku kursistanan i nan supervisornan a pasa ku éksito.
Riba Djaluna 27 di Novèmber a tuma lugá e krusada amfíbiko, siguí pa subimentu di e tres serunan (Veerisberg, Jack Evertzberg i Seru Pretu) riba Djamars. Ademas e kursistanan a kompletá e prueba di natashon di kuater dia, den pisina na Parera. E aktividatnan variá aki no solamente ta forma un eksperiensha di aprendisahe pa e kursistanan, pero ta brinda tambe momentunan di siñansa balioso pa e miembronan ehekutivo i e instruktornan ku ta involukrá den e trayekto aki.
Ta di promé biaha desde establesimentu di e Trayekto na 2011, ku ámbos Trayekto di Formashon Sosial di e dos paisnan ta reuní huntu. Durante e Trayekto karakterístikanan manera disiplina, perseveransha, rèspèt personal, struktura i responsabilidat ta para sentral. Defensa ta enkargá ku e fase militar huntu ku Fundashon Proyekto ‘Un Komienso Nobo’.
Riba Djaweps 30 di Novèmber e kursistanan ta keda risibí ku aplouso di entrada na Fort Amsterdam, ku kua nan a finalisá e fase militar i ta sigui pa e trayekto di siñansa i labor.
