Recientemente Ministerio di Enseñansa, Ciencia, Cultura y Deporte (ESKD) a reuni cu Aqualectra den cuadro red di electricidad y isolacion di edificio di scolnan. A intercambia di idea, riba posibilidadnan pa mitiga e calor den scolnan, cu Corsou ta experencia y tambe explora posibilidad pa yega na solucionnan duradero.
Na aña 2015 ministerio di ESKD a cuminsa ku un trayecto pa pone panelnan solar riba daknan di scol, e scolnan aki ta;
Amador Nita vsbo, Sint Paules vsbo, Juan Pablo Duarte vsbo, RK-MTS, Goslinga vsbo, Sint Jozef vsbo.
Ministerio di ESKD y Aqualectra ta bai sigui traha riba un plan structura pa yega na un maneho eficiente y duradero pa por ekipa scolnan cu sistema di ventilacion, pa asina yega na un solucion structural pa e problema cu nos alumnonan ta experencia na scol. Huntu ta bai cuminsa un trayecto di inventarisacion di e red di coriente na tur scol y tambe e parti di isolacion den e lokaalnan. Esaki pa por planea con ta bai mitiga calor na e diferente scolnan.
Na momento cu inventarisa e red di electricidad y e parti di isolacion ta haña datonan concreto cu mester ta base pa yega na un solucion duradero. Esaki teniendo cuenta cu un bon ambiente escolar ta forma parti integral di enseñansa y ta beneficia nos scolnan.
