E transporte di un grupo di preso di Aruba pa Corsou a wordo anuncia cu masha fanfaria, creando e impresión cu algo inusual a tuma luga. Inclusive hasta a menciona cu e exminister Paul Croes tambe ta bay wordo manda Corsou.
Ya caba trempan su mesun casa a pone un post riba Facebook, despues di a ricibi un cantidad di yamada riba e asunto aki. E noticia no ta berdad, el a publica.
Loke cu EA News a compronde, e sucedido aki no ta algo inusual, pero mas algo normal. No mester lubida cu tin un acuerdo entre e islanan pa coopera cu otro riba diferente tereno. Den caso di husticia, algun biaha pa luna e hefenan di Cuerpo Policial di Caribe Hulandes ta sinta hunto discuti retonan cu nan ta confronta y con un por yuda e otro. Tur esaki cu e meta pa mehora combatimento di criminalidad den area di Caribe Hulandes.
Pues e ta algo normal, pero no ta tur ora esaki ta haya publicidad. Tin biaha e presonan ta wordo manda na sea Corsou of islanan BES pa haya un trato medico cu no tin na Arubal; of tin preso di Corsou ta bini Aruba pa e situacion den siguridad.
E biaha aki e motibo ta diferente. Manera ta conoci, KIA ta completamente yen y na mesun momento mester haci mantencion y renobacion di algun area. Esaki ta nifica cu tin grupo di preso cu no por wordo hinca hunto. Pa e motibo aki, den consulta cu nan coleganan, a haya cooperacion pa manda 9 preso den forma temporal. Asina cu e trabou ta cla, nan ta bolbe Aruba.
Tur speculacion cu tabatin cu algo iregular ta tumando luga eyden, a wordo desbarata door di fuentenan di EA News. Esaki ta algo normal, mescos cu tin biaha tin intercambio di conocemento, den sentido cu tin Polisnan di Aruba ta bay sea pa Corsou, islanan Bes of Sint Maarten y vice versa.
Minister di Husticia ya caba a anuncia algun tempo atras cu tin plannan pa renobacion y mantencion di e facilidad di KIA.