ORANJESTAD, Aruba
Awe un biaha mas por a tuma nota cu trahadornan di GNC a pone trabou para y a declara cu nan no lo drenta den e edificio di nan trabou na Dakota tanten cu Minister Bikker no presenta pa duna cara. Esaki no ta prome biaha cu por tuma nota cu e trahadornan di GNC no ta satisfecho cu e manera con nan ta wordo trata. Dia pa dia por tuma nota cu sea illegalnan ta hui of cu mas illegalnan ta yena e edificionan di GNC. Awe a disidi cu ta basta. Personal a pone trabou para y a hasi un yamada pa Minister Bikker presenta y no manda coordinador manera ela hasi biaha pasa. Esaki pa motibo cu ni despues cu e coordinador Sr. Biaz a presenta of ora cu Sindicato a papia cu e coordinador tanto promesa a wordo hasi pero tog no a cumpli cu ni un di nan. A menciona cu nan tin un stacion di commandant cu ta den samenwerking cu KPA pero hasta esaki no ta funciona pa motibo cu tin un polis so cu ta sinta eynan ta traha wardanan di 16 ora pa dia segun Randolf Hoeverts di GNC. A yega momento pa nos caba cu e weganan di Minister Bikker y pa laga sa cu nos no ta bay tuma ningun engañamento mas for di Minister Bikker. Mientrastante cu nan ta wordo gaña dia pa dia tin mas illegalnan ta wordo deteni cu ta hiba nan bida mas y mas den peliger. Un punto cu tambe a keda tresi dor di Randolf Hoeverts di GNC ta e echo cu e trahadornan di GNC no tin ni un forma pa proteha nan mes. Ni un klop simpel. Esaki tambe a wordo priminti tanto biaha. Na final Cuerpo Policial y miembronan di CEA mester a presenta pa mantene tranquilidad mirando cu e trahadornan di GNC no a drenta y a keda warda presencia di e mandatario.
