ORANJESTAD,Aruba
Crisis di Covid-19 a haci cu hopi famia a perde entrada y esey a haci cu a bay brainstorm cu algun boluntario na KIA unda a yega na un bon idea pa busca un manera pa duna bek na comunidad. Segun director di KIA, Sr. Gino Winklaar for di prome dia cu e crisis a cuminsa personal y staf di KIA a keda traha hunto mescos cu tur frontliner maske tabatin e temor pa cu e virus. Debi cu a sigui traha e sentimento a lanta pa duna bek na esunnan cu a perde nan trabou y pa logra pone e proyecto aki bira un exito a acerca Fundacion pa nos Comunidad y asina yega na personanan cu pa hopi aña ta yuda famia y personanan den dificultad. E cooperacion tabata hopi bon y conhuntamente a acerca comerciantenan pa yega na e articulonan cu e pueblo den necesidad mester awor aki. Fuera di ta gradicido na Fundacion pa nos Comunidad tambe ta gradici na Janine Rodriguez di Cuerpo Policial di Departamento di Slachtofferhulp cu tambe a yuda pa identifica kende ta e personanan cu tin necesidad e momento aki. Durante siman ya caba a entrega cuminda na varios famia cu a perde trabou y awor a cera un cantidad di 60 paki di cuminda y sanidad pa duna bek na comunidad. Esaki ta un start chikito pa e bay bon y despues pa bay un poco mas grandi. Un otro idea cu tin den e proximo fase di e idea aki ta, cu e justiciabel nan yuda cushina pa esunnan cu tin necesidad. Awor aki ta den deliberacion cu Fundacion pa Nos Comunidad pa mira con por yega na e ingredientenan pa start e proyecto y laga un di e departamentonan cushina pa brinda cuminda na famianan den necesidad na e momentonan aki. Tambe Sr. Winklaar a manda palabra di gradicimento pa coleganan di buro di ministerio di husticia cu den corto tempo a yuda recauda fondo pa e proyecto aki. Danki na tur cu a yuda y si kier sigui yuda por tuma contacto cu Fundacion pa nos Comunidad y despues KIA ta haya e articulonan pa reparti nan manera mester ta na famianan den necesidad.
