Despues cu Mediado di Islanan BES Anselmo Pontilius a yega Boneiro pa intermedia den e situación entre SELIBON y Gerencia di BHM, y un caso sumario den Corte, a yega na un acuerdo intermedio.
E partidonan a yega te den Corte, unda cu e Hues cu a presidi e caso a pone riba mesa un proposicion cu ta un solucion temporal. Esaki ta pa permiti e dos partidonan cool down y sinta na mesa en busca di un solucion.
E trahadonan di Servicio di Limpiesa di Boneiro a pone trabou abou desde dialuna ultimo pa malcontento cu gerencia. E accion aki a wordo yama door di nan representantenan sindical di AFBW. Den Corte a splica cu e oferta ta encera cu AFBW ta yama su miembronan y tambe via di Facebook pa reanuda trabou. Esaki a encera cu desde 1.30 di merdia e trabou mester a sigui normal manera semper.
Na mesun momento ta sigui cu e procedura di e mediacion cu ayudo di Lansbemiddelaar. E consulta regular cu shopsteward ta wordo reactiva, y kizas cu un consulta extra cu e diferente kehonan treci dilanti den e caso sumario, relaciona e circunstancianan di trabou.
E acuerdo ta encera tambe cu den e proximo cuatro simanan lo no tin welga (accion) y AFBW tampoco lo yama su miembronan pa bay den un welga of paralisa trabou.
Hues a bisa tambe cu no mas laat cu 5 di mei awo, SELIBON lo por pidi un decision den e caso sumario (via email na Hues), si apesar di e palabracionnan e trahadonan y nan sindicato bay den welga toch.
E partidonan a wordo obliga pa den un ora contesta Hues sino e lo dicta fayo di biaha.
Abogado di ambos partido a informa via email na Hues cu nan ta acepta e proposicion cu inmediatametne a bay na vigor.
