E mensahe di empleadonan di Inmigracion aeropuerto tabata enfatico. Nan no kier e director sra. Pope mas. E no ta sirbi pa e trabou na Inmigracion. Pa colmo no sa con pa trata cu hende.
E situacion ta saliendo for di man y apesar cu a adverti e minister encarga mr. Andin Bikker riba e situacion, e no a haci nada. Pio ainda. Informacion cu e empleadonan a ricibi ta a prolonga contracto di sra. Pope cu un aña mas. Esaki tampoco ta algo cu ta posibel, pasobra tin eleccion na caminda, y no por otorga ningun contracto di e forma aki.
Gran mayoria di trahadonan di aeropuerto a firma un carta pa mustra nan malcontento. Nan ta bisa di ta traha den un maneho estilo dictador, unda cu un palabra so tin.
Nan preocupacion ta cu sra. Pope ta dunando personal di DVG demasiado poder. Esaki por pa loke ta control di e virus pero te na cierto limite. Pero awo ta mete den e maneho diario, locual pa ley no ta permiti. E situacion a prolonga di tal manera cu e trahadonan di IASA a cansa y ta fada.
E situacion actual ta cu por ehempel personal di DVG ta esun cu ta dicidi cual turista cu yega Aruba por baha di avion y cual no. Esaki no ta trabou di DVG. Nan por duna un conseho pero e decision ta uno di Inmigracion. DVG nan ta trabou ta specificamente controla e turista pa coronavirus. El a pone un regla cu so DVG bisa cu un pasahero no por baha, mester contact su persona pa e decision final.
E situacion reinante ta algo cu e trahadonan a yega di expresa nan preocupacion riba esaki caba den pasado. Hasta nan a acudi na Cocolishi y a wordo ricibi door di minister Bikker. A tapa nan preocupacionnan cu un mensahe cu lo bini cu un Management Team, cual nunca a cristalisa. Awe nan ta sinti cu minister a gaña nan. Nan no por ni reclama of bisa algo pasobra sra. Pope ta tuma represalia contra nan.
“Nos no kier Pope mas. E no sa su trabou,” ta e mensahe bon cla cu personal di Immigracion ta manda pa minister y ta spera e tuma accion.
