Planea delanta y sa na unda bo ta proteha bo boto di piscado
Temporadad di horcan a cuminsa. Con prepara abo ta pa proteha bo boto di
piscado? Bo sa unda pa bay? Bo tin tur material cu mester? Kico tur bo
mester haci? Esakinan ta preguntanan cu bo mester cuminsa haci di awor
caba en preparacion pa lo peor. Ta miho prepara adelanta. E momento pa
prepara pa calamidad y seguridad riba lama, ta hopi prome cu e tormenta
cuminsa. Cu esaki na mente, departamento di Agricultura, Cria y Pesca,
Santa Rosa, kier enfoca di awor caba riba concientisacion di piscadonan pa
asina tur piscado ta miho prepara den cualkier eventualidad.
Temporada di horcan ta di juni te december:
Temporada di horcan ta di 1 juni pa 30 di november. Mientras Aruba ta
bendiciona di no a pasa den un horcan directo pa masha tempo, no por
descarta e posibilidad y por corda cu den pasado recien mes tabata tin
tormentanan cu a bolter lama suficiente pa causa daño na pier y botonan di
piscado na costa. Corda tambe cu den e area cu nos ta, ta 3 dia of menos di
anticipacion so tin entre prome aviso pa e tormenta afecta nos costanan.
Esey ta hopi cortico y tur hende por corda e caos cu por pasa aden e ora pa
core haci tur preparacion, specialmente si mester busca of cumpra material.
Pesey, preparacion mester ta di awo caba.
Traha bo plan of repasa y update esaki:
No ta existi un solo plan cu ta pas pa tur situacion ni circumstancia. Ta
depende individualmente cada biaha di varios factor y cu ta specifico pa bo
situacion particular. Pesey, abo ta e prome yama pa traha bo plan(nan) di
antemano y prepara material y otro cosnan necesario pa por ta un stap
adalanta pa actua. Check di antemano cu instancianan necesario y zorg pa
otronan sa di bo plan y detayenan tambe pa caso di emergencia.
Puntonan clave di bo plan:
E topico aki ta uno hopi extenso y di cual un solo articulo no lo cubri. Aki ta
sigui algun punto clave pa cuminsa bo pensamento y stimula bo cuminsa
prepara di awo caba.
1: Unda bo ta (bay) laga bo boto? Un boto mara riba tera ta miho protehi
semper cu uno den awa. Si acaso abo no por saca bo boto, bo mester
di un lugar protehi unda e por keda ancra. Sa di antemano si unda bo
boto ta mara ta adecuado y sino bo mester sa unda bo ta bay hibele pa
si e por keda mara bon proteha. Corda cu bo tin 72 pa 48 ora so entre
aviso y e tormenta su efectonan dal. Si bo ta bay saca e boto hiba tera,
bo mester tin ekipo manera trailer, cabuya etc. cla prepara y den bon
condicion. Corda cu lo ta druk y tur otro hende tambe ta riba caminda
cu na preparacion. E momento ey no ta ora pa realisa cu un taira ta flat
of un bateria no ta traha of ora bo yega na e sitio indica tin un otro
estorbo pa bo laga bo boto.
2: Prepara of strip bo boto. Esaki ta pa reduci loke na ingles ta windage,
esta cosnan cu ta gara biento pero tambe bo kier kita mas tanto cos di
balor of cu por sufri daño for di bo boto. Esey ta encera tambe cu bo
mester por tin lugar pa warda nan tambe. Cosnan manera dak, antena,
solar panel etc., tur ta mester kita pa tin menos efecto di biento riba
boto. Si boto ta keda den awa, zorg pa e bateria y pompnan ta den
optimo condicion.
3: Mara e boto extra. Zorg pa bo tin cabuya extra y mara e boto dobel. Ta
ser bisa cu e boto mester keda mescos cu ta den un cas di haraña e ta
y mara 2 set di cabuya unda uno por ta mas largo cu e otro pa
acomoda e extra haltura di awa y ola si mester. Si bo ta na tera, zorg
pa bo boto ta ancra na tera cu staca of renchi den concret. Si e boto ta
contra un muraya e ta miho protehi door cu por lo menos 1 banda lo tin
menos efecto di biento.
4: Zorg pa bo tin un of mas persona cu den caso cu abo mes no t'ey, cu e
por asisti bo tumando bo lugar. Pa esaki, bo mester comparti y palabra
di adelanta bo plan y mustra unda tur cos ta etc. Den caso cu bo mes
no t'ey e ora pa cualkier motibo, e amigo aki lo por salva bo inversion y
herment di trabou pa bo.
5: Nunca pensa di sali cu bo boto pa lama den tormenta extremo of
horcan, ni keda den boto durante di horcan mes. Gran cantidad di
fatalidad durante horcan ta causa door di esaki. Corda cu bo boto por
ser remplasa pero abo no.
Profundisa bo mes riba e diferente aspectonan di bo
plan:
Mas bo pensa riba dje, mas detaye bo hinca aden, mas miho prepara bo lo ta.
Bo lo ripara cu e lo tuma inversion, tanto di placa como tempo. Pesey mes ta
importante bo cuminsa tempran y presupuesta tur cos di awor caba pa bo
boto, bo inversion y instrumento esencial pa pisca, ta bon proteha ora alarma
di calamidad zona. Tuma tempo awor pa spaar hopi pena despues.
Ta intencion pa periodicamente Santa Rosa saca mas informacion pa
concientisa piscadonan pero si ta desea mas informacion prome cu esey por
referi na diferente fuente online of por manda pregunta of comentario na
info@santarosa.aw
