Traha huntu riba patrimonio di Boneiru: Enkuentro tokante museo i archivo den kuadro di pasado di sklabitut

Dia 12 di desèmber 2024 representantenan for di e sektor kultural na Boneiru a
bini huntu pa papia ku organisashonnan sosial tokante futuro di e patrimonio lokal ku tin di
haber ku pasado di sklabitut. Durante e enkuentro a deliberá tokante pasonan importante pa
mehorashon di museo i archivo. E enkuentro ta parti di un plan mas grandi pa atendé den un
forma mas duradero ku e pasado kompartí i ku kultura. Di e manera akí ta trahando riba un
agènda di akshon. Esaki ta nesesario pa risibí sèn for di Hulanda den kuadro di
konmemorashon di pasado di sklabitut. SKAL, Plataforma NGO Boneiru i e Komishon di
Konmemorashon, Impakto i Futuro a organisá e enkuentro akí.
Durante e enkuentro a papia tokante temanan manera fortifikashon di museo,
engrandesimentu di orguyo kultural i edukashon, i tambe tokante desaroyo di
preskripshonnan lokal riba tereno di e tema akí. A papia tambe tokante digitalisashon,
profeshonalisashon i kolaborashon ku otro islanan i institutonan. Tur esaki ta importante pa
prepará e sektor di patrimonio bon pa futuro. Pa e motibu akí a menshoná tambe ku un
enbolbimentu amplio di komunidat ta hopi importante i otro aña ta bini momentunan èkstra
kaminda ta enbolbí mas habitante i hóben. Di e manera akí e proseso akí ta den signo di ko-
kreashon i kolekshonamentu di konosementu balioso for di henter komunidat. Ku e aporte di
e enkuentronan ta traha un vershon den forma di konsepto di un agènda di akshon. Den
kurso di aña 2025 ta elaborá e agènda di akshon akí mas aleu.
Na aña 2022 gobièrnu hulandes a ofresé su diskulpa pa su enbolbimentu ku pasado di
sklabitut. Tambe gabinete hulandes den su reakshon riba e rapòrt ‘Ketenen van het Verleden
– Kadena di Pasado’ a primintí di pone sèn disponibel den kuadro di e tema akí. Pa e motibu
akí a reservá 33,3 mion euro pa e parti karibense di Reino. Ku e sèn akí entre otro tin ku
fortifiká infrastruktura di e museonan i mester hasi archivonan históriko mas aksesibel. Pa
por hasi uso di e medionan akí, e islanan, Boneiru tambe, pa mas tardá 30 di yüni 2025
mester entregá un agènda di akshon. Den e agènda di akshon mester tin un deskripshon di e
plannan i tambe un bista general di e gastunan pa ehekutá esakinan.
Huntu nos ta traha riba un sektor di patrimonio na Boneiru ku ta duna balor na pasado i ku ta
inspirá pa futuro!