Tourism Corporation Bonaire ( TCB) resientemente a anunsiá ku Boneiru lo bolbe habri espasio aereo entrante febrüari 2021 pa bishitante nan for di Nortamérika ku buelo nan direkto for di Atlanta, Miami, Houston i Newark. Biaheronan for di paisnan di riesgo haltu ku kier biaha pa Boneiru, mester hasi un tèst
antigéniko 4 ora promé ku salida pa Boneiru. E tèst antigéniko ta obligatorio pa biaheronan for
di paisnan di riesgo haltu manera Merka i Canada. Banda di e tèst antigéniko, biaheronan mester laga hasi e tèst di PCR pa mas tardá 72 ora promé ku yegada na Boneiru. Tambe biaheronan mester yena un deklarashon di salú 48 ora promé ku nan salida pa Boneiru.
Huntu ku e dos test nan aki biaheronan mester yena pa mas tardá 72 ora i no mas lat ku 48 ora promé ku salida un deklarashon di salú di departamento di Salubridat Públiko. Después di introdukshon di tèst antigéniko 4 ora promé ku salida pa Boneiru, e aeroliñanan Merikano a kanselá tur nan buelonan pa Boneiru. Enbista ku no ta tur aeropuerto na Merka ta ofrese fasilidat nan kaminda biahero nan por hasi e tèst antigéniko, i tambe debí na otro punto nan kardinal, e aeroliñanan Merikano a disidí pa kanselá tur buelo pa Boneiru ku tabata planiá na luna di febrüari proksimo.
United Airlines a kanselá su buelonan planiá pa 13 di febrüari for di Houston (IAH) i Newark (EWR), i lo reanuda esaki pa fin di luna di mart proksimo. Delta a kanselá su buelo planiá pa 6di febrüari 2021 for di Atlanta (ATL) pa 1 luna i ta planiá awor pa 6 di mart proksimo. E buelo di American Airlines ku tabata planiá pa 13 di febrüari 2021 via Miami (MIA) ta planiá aktualmente den luna di mart 2021. Despues ku a kita e restrikshon di buelo nan prosedente di Merka pa Boneiru riba 15 di yanüari último, Tourism Corporation Bonaire huntu ku Diamond PR a kuminsa ku diferente kampaña di
merkadeo pa e merkado Merikano. E kampañanan aki lo keda aktivo.
