E dokumental a keda desaroyá bou di guia di Angelo Domacassé, huntu ku Reksel Engelhart, pa
demostrá kon e evento chikitu akí a krese i bira renombrá serka amantenan di bon kuminda na
nos isla. E festival kulinario akí a kuminsá mas òf ménos 10 aña pasá i te ku awe e tin e mésun
meta: hala atenshon riba e eksperensia kulinario di Boneiru. Atraves di añanan e festival no
solamente a bira un tremendo oportunidat pa sali un anochi pa nos hendenan lokal, pero
tambe ta atraé hopi bishitante for di mundu henter ku ta en buska di arte i artesania,
entretenimentu i spesialmente tremendo i delisioso prestashonnan kulinario.
Pa motibu di e pandemia a posponé e evento, pero TCB ta spera di por organisá e festival akí
pronto atrobe. E dokumental ta sirbi pa rekòrdá nos esfuersonan di den pasado i komo
motivashon pa futuro. “Mi ta orguyoso di mi koleganan Angelo Domacassé, Helen Mercera-
Thode, Evelain Marchena i Rolando Marin ku a hunga un ròl krusial den desaroyo i kresementu
di nos evento kulinario, pero tambe den lansamentu di e fantástiko dokumental akí. Nos ta
apresiá e dedikashon di nos miembronan di tim relashoná ku realisashon di e tremendo
aktividatnan akí ku ta komplementá nos eksperensia turístiko”, segun CEO Miles Mercera.
E dokumental a estrená ofisialmente riba djaluna 1 di novèmber na Dutch Caribbean TV i Nos
TV i por mir’é riba djaluna 8 i 28 di novèmber pa 19.30 or na Dutch Caribbean TV i tambe na
Nos TV riba djasabra 6 di novèmber pa 20.20 or i riba djadumingu pa 15.30 or. Por mira e
dokumental tambe riba e kanal di YouTube ‘Bonaire Tourism’ di TCB i e página di Facebook
‘Bonaire Tourism’ i ‘Tourism Corporation Bonaire’.
