KRALENDIJK, Bonaire
Tourism Corporation Bonaire (TCB) a kuminsá ku preparashon pa siman di turismo.
E siman di 21 di sèptèmber pa 25 di sèptèmber 2020, ta siman di turismo. E aña akí, e siman di turismo lo ta un tiki diferente kompará ku e añanan anterior. Ku e siman di turismo, TCB ta demostrá prinsipalmente na nos hobennan, e importansia di turismo, no solamente pa e ekonomia di Boneiru pero tambe pa e komunidat.
Pa e siman di turismo, TCB lo organisá un kompetensia di poema ku e tema “Turismo na Boneiru”, entre studiantenan di skolnan básiko di grupo 5 te ku 8. E kompetensia ta tuma luga durante 7 di sèptèmber te ku 18 di sèptèmber. Dia 23 di sèptèmber, lo anunsiá e ganadónan. Lo otorgá e premionan dia 24 i 25 di sèptèmber.
E aña akí tambe, TCB den kolaborashon ku e outor Denise de Jong-Rekwest, a krea un buki titulá “Turismo na Boneiru, Bo Futuro!”, kaminda kada kapítulo ta ilustrá un diferente elemento di e sektor turistiko. Lo lansa e buki akí dia 23 di sèptèmber, durante di e presentashon di Tourism Recovery Plan, na partnernan lokal. Skolnan básiko lo risibí e buki akí dia ku otorgá e premionan di e kompetensia di poema.
Pa kulminá e siman di turismo na e skolnan básiko, TCB lo presentá un vidio edukativo demostrando e diferente ofishinan ku tin den e sektor turistiko. E meta di e vidio ta pa e studiantenan por mira kon nan por kombertí nan interes of hòbi den un profeshon den e sektor turistiko, den futuro.
Algu tambe ku ta forma parti di nos siman di turismo ta e “World Clean-up Day”, ku ta riba 19 di sèptèmber. Normalmente, e dia aki ta selebra ku un limpiesa na diferente parti na Boneiru, kaminda boluntarionan lokal i internashonal ta partisipa. E aña akí, e “World Clean-up Day” lo tuma luga den un otro ambiente. Pa konmemorá e evento akí, TCB lo organisá un “one-hour clean-up” pa organisashonnan hotelero i turistanan ku ke partisipa. E “one-hour clean-up” lo tuma luga dia 19 di sèptèmber i dia 26 di sèptèmber, di 9’or pa 10’or di mahinta, entre Willemstoren i Sorobon Beach na kosta sùit-ost di Boneiru. E aria aki ta sufisiente grandi kaminda ku partisipantenan por praktiká distansia sosial.
TCB ta ekstende un invitashon na pueblo di Boneiru ku ke partisipa na e “one-hour clean-up”.
Pa mas informashon, sigui nos riba nos paginanan di Facebook i Instagram na ingles “Bonaire Tourism” i na papiamentu “Tourism Corporation Bonaire”. Suskribí na nos “newsletter”, ya asina bo ta keda bon informá di tur desaroyonan den turismo na Boneiru
