Tourism Corporation Bonaire (TCB) ta kontentu di por yama bon biní na diferente partner di medionan di komunikashon (prensa i blòger) for di Merka i Hulanda ku ta bin Boneiru pa presensiá e promé edishon di e Siman di Ròm Boneiru.
For di 15 te ku 20 di yüni 2022 TCB ta risibí Bianca Kramer di foodtravelphotography.com. E blòger i periodista kulinario hulandes akí lo forma parti di e Siman di Ròm Boneiru i e ta bai skirbi tokante su eksperensianan na nos isla durante e Siman di Ròm Boneiru den su ‘food & travel blog’ i riba e plataforma kulinario hulandes eatly.nl.
For di Hulanda TCB ta yama bon biní na Bas Erkens di foodies.nl for di 14 te ku 19 di yüni 2022. E periodista kulinario hulandes akí ku ta alabes redaktor di web di foodies.nl, un di e plataformanan kulinario di mas grandi na Hulanda ku 450.000 UMV, ta presente na e promé edishon di e Siman di Ròm Boneiru i lo eksplorá tambe e desaroyonan i eksperensianan kulinario nobo na nos isla.
For di Canada ta yega Kate Dingwall ku ta skirbi tokante bibida stèrki i biña i ku ta alabes periodista i redaktor ‘free lance’ di Forbes.com. E ta bishitá nos isla for di 13 te ku 18 di yüni 2022. Su artíkulonan ta sali entre otro den Wine Enthusiast, MAXIM Magazine i Liquor.com.
Finalmente for di Merka ta bini Betsy Andrews, un periodista i redaktor ‘free lance’ for di New York, ku ta spesialisá den biña, bibida stèrki, kuminda, biahamentu i medio ambiente. For di 11 te ku 15 di yüni 2022 e ta bishitá Boneiru. Su artíkulonan ta sali den vários publikashon, entre otro Food & Wine, Travel + Leisur, Condé Nast Traveler, SevenFifty Daily, Liquor.com i mas.
