Tourism Corporation Bonaire ta sumamente orguyoso di por honra personanan eksepshonal ku a duna un aporte importante na sektor di turismo na nos isla. Ku e programa di Bonaire Friends nos ta selebrá e dedikashon i kalor di Farid Ayubi, Zoey, Fra i Dora, i nos ta rekonosé nan esfuersonan ekselente pa mehorá eksperensia di nos bishitantenan i pa personifiká e espíritu di Boneiru su hospitalidat.
Farid Ayubi, e doño dediká di Sunrise Tours Bonaire, ya pa mas ku dos dékada ta un pilá di sosten i ayudo pa nos bishitantenan. Den un akto ekstraordinario di kariño, Farid a hasi tur loke tabata na su alkanse na momentu ku el a yuda un pareha ku tabata den un situashon difísil. Leslie Howell, ku a sufri un fraktura serio na su kokot’i pia, no por a sigui kana mas na un bich na Boneiru. Aunke e no tabata forma parti di e paseo di Farid, tòg Farid a para su bùs, evaluá e situashon i mesora a regla un ambulans. E akshon di kuido di Farid a bai mas leu ku loke ta normal. El a sòru pa komodidat, el a sòru pa siguridat i e tabata un ehèmpel di e kalor sinsero ku ta karakterisá Boneiru su komunidat.
Zoey, un empleado dinámiko i entusiasmá di Ocean Oasis a sa di kapturá e esensia di energia hubenil i servisio eksepshonal. Durante un komementu na Ocean Oasis un wéspet tabatin e honor di eksperensiá Zoey su atenshon remarkabel i su kuido sinsero. Ku entusiasmo Zoey no solamente a duna un servisio intachabel, pero tambe el a krea un ambiente eksitante i plasentero. Su dedikashon pa mehorá e eksperensia gastronómiko di su wèspetnan pa medio di su interakshon i servisio sinsero, ta reflehá e tipo di hospitalidat ku ta hasi nan eksperensia na Boneiru inolvidabel.
Meimei di un biahe desgarador, Fra a mustra empatia i sosten ekstraordinario na un famia ku tabata tene rou. Den un periodo difísil Fra a saka un man yen di kompashon pa un bishitante ku a bini Boneiru pa tuma despedida di un ser kerí. Su komprenshon, empatia i kòmbersashonnan reflekshonante a sòru pa konsuelo i speransa renobá.
Ya pa dos dékada kaba Dora ta e kara kariñoso ku nos bishitantenan gusta mira ora nan yega Boneiru. Komo un parti integral di e servisio di hür outo di Budget na aeropuerto, konstantemente i konsekuentemente Dora ta saludá nos bishitantenan ku un sonrisa di bon biní i un amabilidat inigualabel. E ta hunga un ròl krusial ora di sòru ku e promé enkuentro ku Boneiru ta unu di kalor i positivismo. Dora ta serka di baha ku penshun i esaki ta marka un logro den su añanan di servisio remarkabel i sigur e meresé un selebrashon sinsero pa su dedikashon di hopi aña largu.
E programa di Bonaire Friends ta keda firme ku su kompromiso pa kada siman tira lus riba personanan eksepshonal. Pa medio di trese e storianan di Farid Ayubi, Zoey, Fra i Dora bou di atenshon, nos ta honra nan aporte na e kultura inklusivo i akohedor di Boneiru. E programa akí no solamente ta rekonosé nan servisio ehemplar, pero e ta tesorá tambe e konekshonnan outéntiko entre nos bishitantenan i nos komunidat lokal, di manera ku ta surgi rekuerdonan i amistatnan ku ta keda.
E programa di Bonaire Friends ta tira lus riba e personanan ekstraordinario ku ta kontribuí pa hasi Boneiru un destinashon realmente eksepshonal. Pa medio di kompartí enkuentronan eksepshonal, nos ta enkurashá bishitantenan pa kompartí nan propio storianan, potrètnan i videonan di enkuentronan eksepshonal ku nos komunidat lokal via e página spesial di Bonaire Friends riba https://bonaireisland.com/bonaire-friends/. Tourism Corporation Bonaire ta invitá tur hende pa partisipá i pa selebrá e konekshonnan úniko i amistatnan duradero ku ta surgi na nos isla.
E programa di Bonaire Friends ta rekonosé lo mihó di Boneiru i tur siman ta sigui honra personanan remarkabel ku a mustra e servisio ekselente i kaluroso hospitalidat di Boneiru su hendenan. E programa akí ta un prueba di e kultura bibitu di nos isla i ta brinda nos bishitantenan e oportunidat pa bini den kontakto ku nos komunidat lokal, di manera ku esaki ta promové lasonan berdadero i rekuerdonan ku ta dura bida largu.
1 comment
[…] Source link […]