Prestashon turístiko mensual na Boneiru – Resultado preliminar
E resultado preliminar ta indiká ku Boneiru a yama bon biní na 13.910 bishitante stayover den luna di novèmber 2023. Den aña 2023, esta di yanüari te ku novèmber, Boneiru a yama bon biní na en total 153.501 bishitante stayover, loke ta mas tantu ku e sifranan pa e mesun periodo na aña 2019 (142.900) i aña 2022 (152.100).
Si nos kompará luna di novèmber 2023 ku luna di novèmber 2019, kaminda 13.400 bishitante a bin Boneiru, nos ta mira un oumento leve di e kantidat di bishitante, loke ta nifiká un kresementu di mas òf ménos 3,78% atraves di un periodo di kuater aña. Kompará ku novèmber 2022, kaminda tabatin 14.706 bishitante, esaki ta nifiká un bahada di mas òf ménos 5,41% di e kantidat di bishitante. Luna di novèmber 2023 sinembargo ta mustra un oumento konsiderabel di e kantidat di anochi ku e bishitantenan a keda, ku un total di 134.400 anochi, kompará ku novèmber 2022, kaminda a registrá 117.287 anochi. Esaki ta indiká ku, en promedio, den luna di novèmber 2023, bishitantenan a keda mas tantu tempu, loke ta nifiká un oumento di mas òf ménos 14,62% di e kantidat di anochi.
Hulanda i Merka ta e dos merkadonan di orígen mas importante pa bishitantenan na Boneiru i tur dos ta stabil. Na luna di novèmber 2023, 2726 bishitante for di Merka a forma 19,6% di e kantidat total di bishitante stayover, miéntras 7062 bishitante for di Hulanda a forma 50,8% di e total.
Remarkabel ta ku bishitantenan for di Kòrsou a hunga un ròl sentral den turismo na Boneiru, ku un aporte di 1752 bishitante, esta 12,6%, miéntras ku Aruba a añadí 374 bishitante, loke a forma 2,7% di e total.
Banda di nos merkadonan mas importante di orígen, bishitantenan for di Alemania, Canada, Bélgika, Brasil, Reino Uní, Colombia i Suisa ta sostené Boneiru su prestashon turístiko. Den luna di novèmber 2023, Alemania a bini dilanti komo un merkado fuerte, ku 374 bishitante stayover, i ku esaki e pais akí a sigura su mes di un lugá riba e lista di merkadonan ku a presta mas mihó den luna di novèmber. Pa loke ta trata e informashonnan demográfiko di nos bishitantenan, e grupo di edat di mas komun ta 45 pa 54 aña.
Si nos tira un bista mas djaserka riba e merkado merikano, ta resultá ku e estadonan Florida, California, Texas, New York, Colorado, Pennsylvania, North Carolina, Virginia, Georgia i New Jersey tabata e fuentenan mas importante di bishitante. E provinsianan mas importante for di unda e bishitantenan for di Hulanda a bini, tabata Zuid-Holland, Noord-Holland i Noord-Brabant. Banda di esaki den luna di òktober Boneiru a yama bon biní na 13.062 bishitante krusero.
Na aña 2023 bishitantenan merikano tabatin diferente preferensia pa loke ta trata akomodashon. Kasi mitar di nan, esta 49%, a skohe pa hotèl, pa motibu ku nan ta apresiá e komodidat i e fasilidatnan di esaki. Un grupo mas chikitu, esta 7%, a skohe pa e ambiente ameno di un apartamento, miéntras ku 13% a bai pa e luho i privasidat di un vila. Algun, mas òf ménos 4%, a disidí pa hospedá serka famia i amigu, i 6% a duna preferensia na e ambiente familiar di nan propio bibienda na nos isla. Sinembargo 20% di e bishitantenan merikano a skohe pa aventura, pa medio di eksplorashon di diferente posibilidat di akomodashon alternativo durante nan estadia.
Bishitantenan hulandes ku a bishitá nos isla na aña 2023, tabatin nan propio eskohonan pa loke ta trata akomodashon. Pa 42% di nan, un hotèl tabatin nan preferensia, pa motibu di e komodidat i fasilidat. Entretantu 16% a gosa di e fleksibilidat i enkanto di un apartamento, i 6,5% a gosa di un eksperensia den un vila. Bishitantenan hulandes a apresiá nan konekshonnan tambe: 9,4% a hospedá serka famia i amigu na nos isla. Un grupo mas chikitu di 5% a skohe pa komodidat di nan propio bibienda, miéntras un grupo un tiki mas grandi, esta di 20,5% a buska alohamentu alternativo.
Pa estadístika i informashon mas detayá tokante Boneiru su prestashon turístiko, bo por bishitá nos wèpsait riba www.bonaireisland.com òf manda un email na info@bonaireisland.com.
