Tourism Corporation Bonaire (TCB) ta organisá su promé Seshon
pa Stakeholder tokante Impuesto di Turista komo parti di su strategia di komunikashon pa
informá stakeholder i partnernan tokante implementashon i progreso di e impuesto di turista. E
seshon ta tuma lugá dia 17 di yüni 2022.
For di 1 di yüli bishitantenan tin ku paga un impuesto di turista di $75 pa persona pa bishita na
Boneiru. Esaki no ta un impuesto nobo òf adishonal. Simplemente e ta remplasá loke
anteriormente na nos isla tabata konosí komo ‘room tax’ i ‘rental car tax’. Ántes tabata kobra
esaki direktamente via e akomodashonnan i proveedornan. E impuesto ta aplikabel pa tur
no-residente di 13 aña bai ariba ku ta drenta Boneiru. No-residentenan di 12 aña i mas chikitu i
habitantenan di e anterior Antia Hulandes ku yega nos isla, tin ku paga $10 pa kada bishita. Ta
paga e impuesto obligatorio digitalmente via un plataforma online òf na yegada na aeropuerto.
For di momentu ku a anunsiá e impuesto di turista ku ta drenta na vigor dia 1 di yüli, TCB huntu
ku Entidat Públiko Boneiru (OLB), Bonaire International Airport (BIA), Bonaire Hotel and
Tourism Association (BONHATA) i IBIS Management Associates Inc (IBIS) a traha riba desaroyo
di e plataforma online pa e impuesto di turista i riba e proseso pa loke ta trata kobramentu i
kontròl di esaki.
E Seshon pa Stakeholder tokante Impuesto di Turista ta tuma lugá riba djabièrnè 17 di yüni
2022 na Courtyard by Marriott Bonaire for di 9.30 or te 12.00 or. Stakeholder i partnernan ku
ta interesá pa partisipá na e seshon akí, tin ku méldu nan mes via e invitashon ku TCB a manda
riba djaluna 6 di yüni 2022, òf manda un email na: marketing@tourismbonaire.com. Pa
stakeholder i partnernan ku no por ta presente na e seshon, riba petishon un lenk pa
‘livestream’ por ta optenibel.
Despues di e Seshon pa Stakeholder tokante Impuesto di Turista, durante e simannan binidero
TCB lo organisá diferente seshon di informashon pa duna un aktualisashon tokante progreso i
implementashon di e plataforma nobo pa e impuesto di turista. Meimei di luna di yüni e
plataforma nobo ta disponibel i lo kompartí esaki ku tur stakeholder i partner.