Durante e seshon a presentá un aktualisashon di e plan di akshon i e prestashonnan general di e industria
Tourism Corporation Bonaire (TCB), huntu ku su partnernan Bonaire Hotel and Tourism Association (BONHATA), Bonaire International Airport (BIA) i Kapitan di Haf a tene e promé seshon di stakeholder di e aña akí.
Durante e seshon direktor di TCB, Miles Mercera, a kompartí un bista general di yegada di bishitante pa luna di yanüari te ku mart di e aña akí, miéntras el a kompará e resultadonan ku e sifranan di 2019. E resultadonan ta mustra ku e kapasidat di transporte aéreo na Nortamérika ta mas abou kompará ku 2019, miéntras e oferta di kamber a krese di 1700+ pa 2800+, loke ta nifiká ku tin posibilidat pa kresementu. Na luna di mart un delegashon boneriano a hiba kòmbersashon ku e kompanianan di aviashon merikano aktual, pero tambe ku otro potensial kompanianan di aviashon i a papia tokante e posibilidatnan pa kuminsá ku mas buelo direkto for di Merka i Canada. A kompartí tambe e kampañanan i strategianan nobo di ‘branding’, entre otro e ideanan grandi di aktivashon pa Merka ku ta planiá pa verano, ku e partnernan na nos isla. A presentá alabes un bista general di e resultado di Relashonnan Públiko i e plan pa e lunanan binidero, inkluso strategianan di merkadeo adishonal i e plannan di kolaborashon ku diferente partner na Merka i Oropa. Tambe a kompartí e proyektonan di merkadeo i eventonan binidero, manera Kings of Krioyo, Bonaire Water Bottle, Bonaire Tourism Scholarship Program, Bonaire Friends, Signage Project, Bonaire Yoga and Wellness Week, Bonaire Rum Week i Marshe di Rincon ku e partnernan na nos isla.
Direktor di BONHATA, Veroesjka di Windt, a kompartí e aktualisashonnan tokante prestashon di akomodashon, ku un okupashon promedio di 75% pa luna di yanüari te ku mart. Kompará ku e mesun lunanan, aña 2022 tabatin un okupashon promedio di 77%. Ta midi e grado di okupashon ku ta verwagt pa e próksimo lunanan te ku yüli na un promedio di 59%, miéntras ku esaki tabata na 63% na aña 2022. Banda di esaki nos a midi un mehorashon den término di nos tarifa diario promedio (Average Daily Rate – ADR). E tarifa diario promedio pa luna di yanüari te ku mart tabata $ 253. Kompará ku e mesun lunanan akí, aña 2022 tabatin un tarifa diario promedio di $ 227. E entrada pa kada kamber disponibel, indiká komo ‘Rev Par’, pa luna di yanüari te ku mart tabata $ 189. Kompará ku e mesun lunanan akí, aña 2022 tabatin un Rev Par di $ 169.
Direktor di BIA, Onno de Jong, a kompartí un bista general di e kantidat di bishitante di e último lunanan. Na aña 2022 e aeropuerto a konta en total 423.727 bishitante, sin inkluí pasahero di tránsito. Pa kompará: na aña 2021 tabatin en total 256.748 bishitante, sin inkluí pasahero di tránsito. E sifranan di aeropuerto ta diferensiá for di e resultadonan di e impuesto di turista, pa motibu ku BIA ta konta yegada i salida di tur bishitante, inkluso residentenan. A kompartí tambe vários detaye tokante e último desaroyonan na BIA, manera inisio di buelo di JetAir for di Kòrsou i Aruba pa Boneiru, e instalashon di awa shushi, markamentu di liña i otro señalnan riba plataforma, e ‘AMBU-lift’, e karusel di ekipahe, supervishon i maneho di stashonamentu di outo i ampliashon di siguridat.
Kapitan di Haf Gunther Flanegin a presentá e datonan mas resien di luna di yanüari te ku mart. Na luna di yanüari Boneiru a yama bon biní na 27 barku krusero. Na luna di febrüari esaki tabata 29 barku krusero i na luna di mart 27. Huntu ku un delegashon boneriano e Kapitan di Haf e partisipá na Seatrade Cruise Global, kaminda nan a hiba deliberashon ku diferente kompania krusero. Durante e presentashon a lansa e wèpsait nobo Cruisecall.App, kaminda bo por haña tur informashon tokante tur bishita di barku krusero na Boneiru.
