TCB ta invitá stakeholdernan di den turismo
Tourism Corporation Bonaire (TCB) ta organisá su di dos seshon di Aktualisashon di Merkadeo i Relashonnan Públiko (Marketing & PR Update) komo parti di e seshonnan di kada tres luna relashoná ku enbolbimentu di stakeholdernan. E evento ta tuma lugá dia 1 di aprel 2022.
Despues di un eksitoso Siman di Merkadeo estilo ‘Kickoff’den luna di yanüari 2022, TCB ta organisá su di dos Aktualisashon di Merkadeo i Relashonnan Públiko pa 2022 pa tene su partnernan i stakeholdernan na altura di tur loke TCB huntu ku su stakeholdernan a traha riba dje i di e plannan pa e lunanan binidero.
Direktor di TCB Miles Mercera lo duna informashon na e stakeholdernan di TCB tokante e siguiente tópikonan: prestashonnan riba tereno di turismo, tendensianan i komportashon di konsumidó, ‘branding’ i merkadeo i e eventonan pa 2022. Banda di esei TCB a invitá Jody Diamond, direktor di e ofisina di relashonnan públiko pa Boneiru, Diamond PR, pa presentá un bista general di e trabounan relashoná ku relashonnan públiko ku a tuma lugá den aña 2021, e resultadonan di e promé kuartal di 2022 i e strategia di relashonnan públiko di TCB pa aña 2022.
E Aktualisashon di Merkadeo i Relashonnan Públiko ta tuma lugá riba djabièrnè 1 di aprel 2022 na Delfins Beach Resort di 10.00 or di mainta pa 12.00 or di mèrdia. Pa partisipá na e enkuentro akí, reservashon ta un eksigensia. Ta pidi partnernan ku ta interesá pa partisipá, pa manda un email na marketing@tourismbonaire.com.
Despues di e seshon di stakeholder akí, TCB huntu ku su stakeholdernan ta organisá su konferensia di prensa di kada tres luna. Meta di e konferensia di prensa akí ta pa informá nos komunidat lokal tokante e desaroyonan den sektor turístiko. Durante e konferensia di prensa e siguiente stakeholdernan lo duna un presentashon: gobièrnu di Boneiru, kapitan di haf, Bonaire Hotel and Tourism Association (BONHATA), Bonaire International Airport (BIA) i Diamond PR.
