Despues di 25 aña Boneiru ta riba e tarima internashonal di
Miss Universe atrobe, loke ta un logro importante pa nos isla. Ku orguyo Tourism
Corporation Bonaire (TCB) ta anunsiá ku nan a optené e lisensia pa Boneiru su
partisipashon na e sertámen di Miss Universe.
E último dos biaha ku Boneiru a partisipá na Miss Universe tabata na aña 1998, kaminda e
elegante Uzmin Evertsz a representá nos isla, i na aña 1999 tabata Julina Felida. Awor akí,
despues di mas ku dos dékada, Boneiru ta preparando pa un biaha mas mustra mundu nos
bunita hendenan i e fantástiko naturalesa di nos isla.
Komo e doño ofisial di ‘franchise’, Tourism Corporation Bonaire durante e último dos aña a
negoshá tokante Boneiru su partisipashon. Komo munisipio spesial di Hulanda, nan no
tabata rekonosé Boneiru komo pais ku por partisipá individualmente na e sertámen di Miss
Universe. For di aña 2024 nan ta rekonosé Boneiru i nos isla ta bini na remarke atrobe pa
partisipashon.
Miss Universe, un sertámen anual di beyesa, ta mundialmente konosí, i banda di Miss
World, Miss International i Miss Earth nan ta konsiderá Miss Universe komo e sertámen mas
grandi di beyesa. For di aña 1956 Miss Universe ta un plataforma pa empoderamentu di
hende muhé, interkambio kultural i selebrashon di diversidat.
“Komo direktor di Tourism Corporation Bonaire mi ta kontentu di por anunsiá nos regreso
despues di 25 aña riba tarima di Miss Universe. E oportunidat akí lo mustra Boneiru su
kultura i naturalesa úniko na un públiko mundial, fortifiká nos presensia internashonal i
promové nos dedikashon na diversidat i sostenibilidat. TCB lo traha huntu ku partnernan i
stakeholdernan anterior pa sigurá e mihó representashon di nos isla,” segun Miles Mercera.
TCB ta rekonosé importansia di Boneiru su partisipashon na Miss Universe komo medio pa
‘nation building’, empoderamentu di hende muhé i promové rikesa kultural ku nos isla ta
para p’é. Pa medio di e plataforma akí Boneiru ke kompartí su tradishonnan úniko, su
paisahenan impreshonante i e kalor di su habitantenan ku un públiko internashonal,
reafirmando su lugá riba esenario mundial.
E preparashonnan ya kaba ta den ‘full swing’ i TCB ta trahando duru pa sòru ku Boneiru su
presensia na Miss Universe 2024 lo surpasa tur ekspektativa. Keda pendiente pa mas
anunsio.
Tourism Corporation Bonaire ta optené lisensia pa regreso di Boneiru na Miss Universe despues di 26 aña
