Tourism Corporation Bonaire (TCB) a organisá un evento na Museo SKAL pa lansamentu di su di kuater Buki di Turismo ku komo título ‘Turismo na Boneiru, mi Kultura, mi Enkanto!’
Tabata un anochi alegre ku presensia di direktor di Tourism Corporation Bonaire, Miles Mercera, diputado di Turismo Hennyson Thielman, eskritor i editor Denise de Jongh-Rekwest, hefe di servisio di SKAL Felix ‘Papito’ Thomas i miss turismo Sunniva Manuel. E buki akí ta dediká na e eksperensianan outéntiko di Boneiru, inkluso su patrimonio lokal i kultural i hopi mas ainda.
E di kuater buki di turismo titulá ‘Turismo na Boneiru, mi Kultura, mi Enkanto!’ ta forma parti di e plan di TCB pa mas enbolbimentu di komunidat. E enfoke di TCB ta pa inkorporá turismo komo parti di nos programanan edukativo na nos skolnan lokal.
TCB a firma un Memorandum of Understanding (MoU) huntu ku SKAL. Pa medio di firmamentu di e MoU akí, ámbos partido ta bai di akuerdo pa traha huntu riba proyektonan pa promové kultura i patrimonio di Boneiru dentro di e sektor turístiko. E partidonan lo traha huntu pa na promé lugá preservá e patrimonio kultural di Boneiru i na di dos lugá sigurá i promové formanan nobo di arte i kultura dentro di e sektor turístiko, tantu lokal komo internashonal.
Durante e anochi ofisialmente a presentá diferente skol básiko ku ta bai partisipá na e Kompetensia di Baile Folklóriko. E skolnan ku ta bai partisipá ta Skol Amplio Papa Cornes, Kolegio Kristu Bon Wardador i Kolegio San Luis Bertran. E kompetensia ta tuma lugá durante e evento Taste of Bonaire riba djabièrnè 30 di sèptèmber 2022.
