E inisiativa akí tin komo meta pa rekonosé i selebrá hendenan ku realmente ta personifiká esensia di Boneiru, i enkurashá nos bishitantenan pa konta tokante nan enkuentronan positivo ku nos habitantenan lokal.
Boy Rozendaal a risibí rekonosementu pa su dedikashon i servisio eksepshonal ku a laga un impreshon permanente serka e bishitantenan. Den un mensahe konmovedor Ana Hotaling ta konta tokante su eksperensia durante su promé paseo pa bai snòrkel bou di guia na Klein Bonaire, kaminda e tabata su so, miéntras sobrá di e grupo tabata konsistí di un famia di Dinamarka i un pareha lokal.
Sinembargo, e karakter kaluroso i hospitalario di Boy a sòru pa konektá e wéspetnan ku otro i a fomentá un bon komunikashon entre nan tur ku tabata snòrkel. Na final di e ekskurshon nan tabata kòmbersá manera amigu bieu ku otro i nan a bolbe topa atrobe na 1000 Steps i den Playa durante e dianan siguiente.
Den un forma profeshonal Boy a hiba nan na e sitionan di mas bunita pa snòrkel, miéntras ku el a kompartí tambe su konosementu amplio tokante e bida bou di laman fasinante ku nan tabata topa. El a resultá di ta un guia ekselente, tantu na momentu di snòrkel komo ora di mustra nan e maravianan di Boneiru.
Tourism Corporation Bonaire ta felisitá Boy Rozendaal kordialmente pa su aporte eksepshonal na industria di turismo di Boneiru i pa su ròl komo embahador ehemplar di nos komunidat lokal.
E kampaña di Bonaire Friends ta sigui invitá bishitantenan pa kompartí nan propio storianan tokante enkuentronan remarkabel ku e poblashon lokal di nos isla. Ta enkurashá wéspetnan pa entregá nan anékdotanan, potrètnan òf videonan riba e página spesial di Bonaire Friends riba https://bonaireisland.com/bonaire-friends/.
Tur siman Tourism Corporation Bonaire ta selektá un persona ku ta meresé pa risibí e premio, tirando lus riba e hospitalidat i servisio remarkabel di Boneiru su habitantenan.
E programa di Bonaire Friends ta un prueba di e kultura kaluroso i inklusivo di nos isla i ta invitá bishitantenan pa drenta den kontakto ku nos hendenan lokal i sera amistatnan duradero.
