Ku profundo rèspet i un kurason pisá Tourism
Corporation Bonaire (TCB) a tuma nota di fayesimentu di señor Ronnie Pieters, e promé
direktor ofisial statutario di TCB. Su liderazgo i su dedikashon inkansabel a pone e base
pa kresementu i desaroyo duradero di Boneiru su sektor turístiko.
Na aña 1991 Ronnie Pieters a bira e promé direktor ofisial di turismo pa Boneiru, despues
ku e diputado di turismo di e tempu ei, Ramonsito Booi, a lanta TCB. Promé ku el a aseptá
e funshon akí, Ronnie a hunga un ròl krusial den supervishon di e promé Plan Maestro pa
Turismo di Boneiru, den kua nan ta rekomendá lantamentu di un instituto independiente
pa manehá i promové turismo. TCB a bira e instituto ei i bou di guia di Ronnie a pone e
base pa e strategianan eksitoso ku a duna forma na Boneiru su sektor turístiko pa e
próksimo dékadanan.
Algun di su hopi logronan: Ronnie Pieters a kompletá i ehekutá e promé plan di desaroyo
di turismo sostenibel di Boneiru, el a introdusí strategianan krítiko di merkadeo pa Oropa
Oksidental, i el a lanta e promé ofisinanan di turismo na New York, Hulanda i Venezuela.
Su esfuersonan a kondusí tambe na ampliashon di Boneiru su presensia internashonal,
ku apertura di un ofisina di turismo na Frankfurt, Alemania.
Ronnie Pieters no tabata solamente un vishonario pero tambe un berdadero embahador
pa Boneiru. E tabata e forsa impulsor tras di inisiativanan manera “Bonaire Tourism
Status Report” i programanan ku ta enfoká riba komunidat manera “Keep Bonaire Clean”
i “Taste of Bonaire”. Su pashon pa sambuyamentu i konservashon di nos bida bou di
laman a resultá den e echo ku Boneiru a bira un destinashon di buseo ku fama mundial ku
lantamentu di e “Bonaire Dive Festival” anual.
Kisas un di su legadonan di mas grandi ta su dedikashon na edukashon i konsientisashon.
Ronnie a traha inkansablemente pa eduká su hendenan di Boneiru tokante importansia i
balor di turismo, miéntras el a sòru tambe pa profeshonalnan di TCB kontinuá ku nan
desaroyo pa medio di programanan maestro i kapasitashon spesialisá. Hopi di e aktual
profeshonalnan di turismo a kuminsá nan karera bou di su guia i a benefisiá di su vishon
i liderazgo.
Ronnie Pieters su kontribushonnan na TCB i sektor di turismo di Boneiru ta inkalkulabel,
i su trabou ta sigui inspirá nos te dia djawe. Su legado lo keda un piedra di skina di e
fundeshi riba kua TCB ta pará, i su vishon pa semper lo keda un guia pa futuro di turismo
na nos isla.
TCB ta ekstendé su sinsero kondolensia na famia di Ronnie Pieters den e tempu difísil
aki. Nos ta honra su memoria i ta agradesido pa su kontribushonnan inmenso na Boneiru.
Ku su famia haña forsa i konsuelo, sabiendo ku durante hopi generashon nos isla lo sinti
su impakto.
