Tourism Corporation Bonaire ta firma MOU cu talentonan local pa promove Boneiro

Tourism Corporation Bonaire (TCB) ta contento di por anuncia un Memorandum of Understanding (MOU) cu el a firma cu un grupo diverso di persona excepcional, caminda cada un di nan ta un ‘Profesional Local’ cu a haña reconocemento como embahador local di Boneiro. E colaboracion aki ta marca un logro importante den promocion di Boneiro su identidad, cultura y bunitesa unico.

E acuerdo cu nan a firma ta nifica un colaboracion duradero riba termino largo, cu enfoke riba duna publicidad na Boneiro su bunitesa pa medio di diferente iniciativa, evento, proyecto, competencia y e pasion sincero cu e profesionalnan aki tin pa nan isla.

Na aña 2022 cu orguyo Boneiro a bira parti di e MOU aki cu un aliniacion di talentonan local excepcional cu a pone nan stempel riba tanto nivel nacional como internacional. Cada un di e personanan aki ta aporta cu su propio combinacion di habilidad distinto y un compromiso comparti pa mustra mundo e encanto y actividad di Boneiro.

Aki bou ta sigui un bista general cortico di e personanan aki cu ta destaca y cu ta forma parti di e colaboracion:

Elton Taty Frans – windsurfer profesional

Elton Taty Frans a lanta na lama ina edad hoben caba el a desaroya un pasion pa windsurf. Su carera como windsurfer profesional ta keda caracteristica pa un seri di prestacion, entre otro hopi victoria i clasificacionnan halto den eventonan rond mundo.

Youp Schmit – windsurfer profesional

Youp Schmit a haci su debut como windsurfer profesional na aña 2010 y for di e tempo ey el a  logra prestacionnan remarcabel, entre otro campeon mundial Freestyle PWA Youth na aña 2011 i 2012. Constantemente e ta den top 10 di PWA world tour.

Alvinson Soliana – atleta profesional

E carera di Alvinson Soliana ta un di dedicacion na fitness y bodybuilding. El a descubri su amor pa fitness na edad di 20 aña y esaki a transforma su bida. Esaki a bira un estilo di bida y un pasion cu ta dun’é e impulso pa logra su metanan.

Sabi Saragoza – motosiklista profeshonal

Na edad hoben Sabi Saragoza a cuminsa core motorcycle y el a crece bira un motociclista profesional cu ta conoci pa su shownan y presentacionnan impresionante. Pa medio di su habilidad el a haña reconocemento, hopi premio y un grupo considerabel di siguido online.

Ermaisha Martinus –Embahador y strea hoben multitalentoso

Ermaisha Martinus ta un hoben multitalentoso cu a logra exitonan significante riba diferente tereno, for di gana titulonan carnavalesco te destaca den literatura y cultura. Su aporte ta refleha su envolvimento cu e patrimonio bibito di Boneiro.

Maurison Martinus – coredo di BMX profesional

Maurison Martinus, conoci tambe como MauBikeLife, ta un campeon Caribense como coredo di BMX y  specialista den akrobasia riba ATV. Su prestacionnan y su presencia online a percura pa e tin un grupo dedica di siguido y a haci posibel cu e por inspira e siguiente generacion.

Amado Vrieswijk

E carera di windsurf di Amado Vrieswijk a cuminsa na momento cu el a bay wak King of the Caribbean Windsurf World Cup na aña 2002. Rapidamente el a establece su nomber riba tereno di windsurf, el a para riba hopi podio y el a logra titulonan cu ta subraya su talento excepcional.

Miles Mercera, director di TCB, a expresa su entusiasmo di e siguiente manera: ‘E colaboracion aki ta simbolisa e unidad y residencia di Boneiro. Nos Profesionalnan Local ta representa alma y curason di nos isla, y pa medio di e colaboracion aki nos ta mustra e espirito cu ta haci Boneiro berdaderamente excepcional.’

E colaboracion entre TCB y e profesionalnan remarcabel aki ta nifica un dedicacion comparti pa mustra mundo Boneiro su cultura, deporte y talento unico. Hunto nan meta ta pa aporta na crecemento y reputashon di nos isla riba escenario internacional.