Pa trese nos músika lokal tradishonal den Parke Wilhemina kaminda nos habitantenan i bishitantenan por gosa di esaki.
Dia 3 di mei 2023 e konhunto musikal tan gustá di Boneiru, Hòfi Kultural, a enkantá tantu nos habitantenan lokal komo nos bishitantenan ku nan presentashon vibrante di músika tradishonal den Parke Wilhelmina.
Mas òf ménos 30 miembro di e grupo di músiko talentoso akí a laga tur hende tende kon nan ta dominá instrumentonan manera kuarta, wiri, tambú, maraka, tamburein i raspa.
Loke a hasi e presentashon akí realmente remarkabel, tabata e kategoria di edat di e músikonan, ku ta varia entre 60 pa 85 aña. Nan entusiasmo hubenil pa músika i e plaser ku esaki por brinda otro hende a resultá kontagioso, i e públiko a gosa un mundu.
E evento akí a tuma lugá durante bishita di e barku krusero Carnival Horizon i a ofresé tantu nos bishitantenan komo nos habitantenan lokal un eksperensia kultural úniko.
Miéntras ku Hòfi Kultural tabata laga melodianan zona ku tin nan rais fuertemente ankrá den e patrimonio riku di Boneiru, e públiko no por a hasi nada otro ku entregá nan mes na e ritmonan enkantador i e tononan yen di ‘soul’.
Tourism Corporation Bonaire (TCB) ta ekspresá su sinsero apresio pa e kolaborashon nobo ku Hòfi Kultural pa nan koperashon presioso na momentu di duna atenshon na e patrimonio musikal di nos isla, promoviendo un profundo sintimentu di orguyo i konekshon ku nos tradishonnan.
E siguiente oportunidat pa eksperensiá e tononan di e músikonan di Hòfi Kultural ta dia 21 di yüni durante bishita di e barku krusero Carnival Celebration. E meta final di TCB ta pa ofresé artistanan lokal e posibilidat pa kompartí nos ritmonan lokal ku mundu i ku tempu semanalmente trese músika lokal den nos sentro di suidat.
TCB ta anhelá e próksimo presentashon, di manera ku un biaha mas tantu nos bishitantenan komo nos habitantenan lokal por gosa di e músika hopi animá i rítmiko ku ta representá Boneiru.
