Tourism Corporation Bonaire (TCB) ta orguyoso di por rekonosé Ryan Augusta, Gerarda Dirksz i Davide Chiarlo pa nan kontribushonnan remarkabel na e industria di turismo na Boneiru. A honra e personanan ekselente akí komo parti di e programa di Bonaire Friends, komo rekonosementu pa nan dedikashon insesante pa brinda hospitalidat eksepshonal i enrikesé eksperensia di nos bishitantenan na nos isla.
Ryan Augusta ta un berdadero embahador di Boneiru. E no ta solamente un instruktor eksepshonal di kitesurf na Kitecity, pero tambe un embahador orguyoso pa Boneiru. Ku su konosementu amplio, su abilidatnan remarkabel den dunamentu di instrukshon i su pashon sinsero pa nos isla, Ryan ta un figura hopi solisitá di parti di bishitantenan ku ta buskando un eksperensia inolvidabel di kitesurf. Su aktitut respetuoso pa loke ta trata naturalesa, bientu, laman i hende ta personifiká berdaderamente e esensia di Boneiru. E lèsnan di Ryan a laga un impreshon permanente atras serka hopi bishitante, entre otro un mama di 52 aña ku tin tres yu i ku a deskribí su tempu ku Ryan komo simplemente inkreibel. Ryan su presensia komo ‘kara’ di Boneiru kada biaha di nobo a hala bishitantenan trese bèk Boneiru, i su karakter kaluroso i sinsero ta mehorá e eksperensia di vakansi pa tur hende. Su dedikashon i ekspertisio ta hasié un ekselente Bonaire Friend.
Gerarda Dirksz ta doño di Kunuku Spa ku nan ta deskribí komo un paradiso di relahamentu moderno. Gerarda Dirksz ta haña rekonosementu pa su servisio eksepshonal na Kunuku Spa, un oásis moderno i trankil na nos isla. E ambiente sereno i e servisio ekselente di Gerarda a impreshoná su bishitantenan. Pa motibu di su dedikashon pa sòru pa un eksperensia inolvidabel di spa, el a haña hopi elogio di su bishitantenan ku a deskribí Kunuku Spa komo un sitio ku bo mester a bishitá.
Su pashon pa duna lès di buseo i e amor ku Davide Chiarlo, instruktor na Dive Friends, tin pa Boneiru a hasi un impreshon grandi riba e personanan ku ke eksplorá e milagernan di bou di laman di nos isla. Komo instruktor na Dive Friends, Davide ta hasi tur loke ta na su alkanse pa laga bishitantenan nobo sinti nan mes kómodo i sigur di nan mes durante sambuyamentu. Su pasenshi i aserkamentu atento ta kita tur miedu ku bishitantenan por tin, manera un wéspet di 48 aña ku a bai sambuyá pa promé biaha i ku a papia yen di elogio tokante e esfuersonan èkstra i e atenshon personal di Davide. Davide su dedikashon na momentu di duna instrukshon, huntu ku su rekomendashonnan pa restorantnan i atrakshonnan lokal, ta reflehá e afekto profundo ku e tin pa Boneiru i pa kompartí bunitesa di nos isla ku otronan.
TCB ta felisitá Ryan Augusta, Gerarda Dirksz i Davide Chiarlo ku nan rekonosementu bon meresí. Nan hospitalidat i dedikashon eksepshonal i nan interakshonnan kaluroso ku nos bishitantenan ta personifiká e espíritu inklusivo i hospitalario di Boneiru. E programa di Bonaire Friends ta tira lus riba hendenan ekstraordinario, ku ta duna nan aporte pa hasi Boneiru un destinashon realmente eksepshonal.
Nos ta enkurashá bishitantenan pa kompartí nan propio storianan, potrètnan i videonan di enkuentronan eksepshonal ku nos komunidat lokal, via e página spesial di Bonaire Friends riba https://bonaireisland.com/bonaire-friends/. TCB ta invitá tur hende pa partisipá i pa selebrá e konekshonnan úniko i amistatnan duradero ku ta surgi na nos isla.
