Tourism Corporation Bonaire ta apuntá dr. Robertico R. Croes komo Tourism Strategist & Advisor

Tourism Corporation Bonaire (TCB) ta apuntá dr. Robertico R. Croes komo ‘Tourism Strategist & Advisor’, un korto tempu despues ku a anunsiá e Direktor nobo di TCB, Miles Mercera. 

Dr. Croes ta trese mas ku 40 aña di eksperensia den e industria di turismo i asuntunan eksterior na su ròl nobo. Tambe, Dr. Croes ta un profesor, dekano asosiado (‘Associate Dean’) i Direktor na Dick Pope Sr. Institute for Tourism Studies na e universidat di Central Florida di Rosen College of Hospitality Mangement. 

“Ta un momentu di sumo entusiasmo pa kontribuí na e strategia di e industria di turismo na Boneiru, mirando ku e isla no solamente ta rekuperando pero tambe ta posishoná su mes komo un isla renobá,” segun Dr. Croes. “Ta un honor pa mi por komparti mi ekperensia pa yuda guia Boneiru i e ekonomia di e isla den e direkshon positivo, mientras ku e isla ta risibí konosementu den e segmento nobo aki.”

Dr. Croes su eksperensia amplio ta konsistí di publikashon di 4 buki tokante di maneho di turismo na destinashonnan tropikal, turismo i kon pa kombatí pobresa, e diferente retonan ku islanan chikí ta enfrentá, i aplikashon di modelonan di demanda di un ekonomia chikí. Den desèmber 2021, Dr. Croes lo publiká su di 5 buki titulá: ‘Small Island and Small Destination Tourism.’ Ademas, Dr. Croes a duna su kontribushon na mas ku 130 estudionan ku a wòrdu publiká i tambe el a emití i presentá mas ku 30 rapòrt riba diferente tópikonan, rònt mundu. Alabes, Dr. Croes a sinta komo konsehero pa diferente destinashon, manera Nicaragua, Costa Rica, Ecuador, Brasil, Aruba, Kòrsou, Boneiru, Granada, Italia i Merka.

Despues ku Dr. Croes a risibí su doktorado di e universidat di Twente na Hulanda, Dr. Croes a publiká diferente artíkulo den varios revista di turismo i tambe ta un di e kuater editornan. Dr. Croes a risibí tambe varios premio, manera Thea Sinclair Award na 2015 i 2018, UCF Research Incentive Award (RIA) na 2015, i Best Graduate Student Research Paper na 2015, pa menshoná algun. Tambe, Dr. Croes a presentá na e 32nd International Association of Hospitality Financial Management Education Research Symposium na e universidat di New York.