TCB ta informá
Tourism Corporation Bonaire (TCB) kier a informá e fechanan relashoná ku e próksimo eventonan pa luna di aprel te ku desèmber 2022.
TCB lo organisá atrobe e evento di Taste of Bonaire, ku ta tuma lugá den Parke Wilhelmina entre 6 or di atardi pa 10 or di anochi. E evento ta tuma lugá riba e siguiente fechanan:
-11 di yüni 2022 – Taste of Bonaire tin komo tema Kultura
-2 di yüli 2022 – Taste of Bonaire ku e tema Talento
-6 di ougùstùs 2022 – Taste of Bonaire ku e tema Resiklahe
-24 di sèptèmber 2022 – Taste of Bonaire ku e tema Siman di Turismo
E evento di fin di aña “Bonaire Christmas Shopping Night” ta tuma lugá dia 17 di desèmber 2022 di 6 or di atardi pa 10 or di anochi.
Komo parti di e plan di rekuperashon di turismo un di e obhetivonan mas importante ta pa ekspandé e benefisionan di turismo i krea oportunidat di partisipashon den turismo pa nos komunidat. Pa e motibu aki TCB ta introdusí e aña aki un evento nobo titula Bario Festival ku ta bai tuma lugá den e diferente barionan di Boneiru. E idea di e evento akí ta pa trese e turista mas den nos barionan kaminda lo duna nos habitantenan di e bario e oportunidat pa demonstrá nan talento i kreatividat i asina generá mas entrada tambe pa nos habitantenan i nos barionan di Boneiru.
Ku ayudo di TCB e plataformanan di kada bario lo organisá e eventonan, ku ta tumá luga di 5 or di atardi pa 10 or di anochi.
E fecha pa kada bario ta lo siguiente:
-Antriol: dia 2 di aprel 2022 na Plaza Chico Goeloe
-Rincon: dia 7 di mei 2022
-Nikiboko: dia 28 di mei 2022
-Tera Kòrá: dia 30 di yüli 2022
-Nort’i Saliña: dia 10 di desèmber 2022
Tambe kuminsando dia 2 di aprel 2022, TCB lo kuminsa organisá atrobe e evento na Flamingo International Airport kaminda pasaheronan ku yega lo haña un bon biní ku músika di Ka’i òrgel.
TCB ta partisipá tambe ku e aña aki e grupo di TCB & Friends Culture Group lo ta partisipando den e Simadan di Rincon dia 30 di aprel i na Playa dia 1 di mei 2022.
