Tourism Corporation Bonaire ta anunsiá Elesiër Angel komo direktor statutario interino di TCB

Ku hopi plaser Tourism Corporation Bonaire
(TCB) ta anunsiá nombrashon di Elesiër Angel komo director statutario interino entrante 1 di
yanüari 2025.
Elesiër “Ely” Angel a nase i lanta na Boneiru i e tin un laso profundo ku nos isla i un tesoro
na eksperensia den sektor turístiko. Ely su biahe den turismo a kuminsá na e edat
remarkabel di 12 aña, loke ta mustra su pashon i dedikashon na Boneiru su sektor turístiko.
Ely tin un diploma di master den Tourism Destination Management di Universidat di Breda
na Hulanda, ku a ekip’é ku e konosementu i ekspertisio nesesario pa nabegá atraves di e
komplehidat di e aktual paisahe turístiko mundial. For di tempu ku na aña 2021 el a drenta
servisio di TCB, Ely a desempeñá un ròl fundamental den inisiativanan i strategianan di e
organisashon, i el a kontribuí na kresementu di turismo na Boneiru.
Durante e kuater añanan tras di lomba, Ely a traha estrechamente huntu ku e direktor
saliente Miles B M Mercera, ku ta renunsiá na fin di luna di desèmber 2024. Nan trabou
huntu tabata di importansia krusial pa realisá e logronan importante pa Boneiru su sektor
turístiko. Ely su transishon pa e ròl di liderazgo akí ta para garantia pa kontinuidat i ta sigui
konstruí riba e base ku a keda establesé durante Mercera su mandato.
E direktor saliente, señor Mercera, a bisa lo siguiente: “Tabata un honor pa duna guia na
Tourism Corporation Bonaire i pa traha durante e kuater añanan tras di lomba ku un tim
asina talentoso. Mi ta inkreibelmente orguyoso di e progreso ku huntu nos a logra i e base
fuerte ku nos a pone pa sektor turístiko di Boneiru. Mi tabatin e previlegio pa mira Elesiër
Angel krese den nos organisashon i pa tabata testigu di su pashon pa nos tim, pa TCB i pa
Boneiru su sektor turístiko. Ely su konosementu profundo di e identidat úniko di Boneiru, su
aserkamentu inovativo i su kompromiso ku turismo sostenibel ta hasié e lider perfekto pa e
siguiente kapítulo akí. Mi ta deseá Ely i e tim di TCB éksito kontinuo, segun ku nan ta
kondusí Boneiru su turismo na triunfonan mas grandi ainda.”
“Ku nombrashon di Elesiër komo direktor statutario interino nos ta konfirmá nos kompromiso
ku un proseso kuidadoso di selekshon ku ta kuadra ku e prinsipionan di ‘corporate
governance’. Direktiva tin pleno konfiansa den Elesiër su liderazgo i vishon, i nos ta
entusiasmá di por dun’é sosten ku kontinuashon di éksito di TCB”, segun un deklarashon di
Hunta di Direktiva di TCB.
Komo direktor statutario interino Ely ta bai enfoká riba fortifikashon mas aleu di Boneiru su
posishon komo destinashon turístiko, miéntras ku e énfasis ta keda riba sostenibilidat i
enbolbimentu di nos komunidat. TCB ta konbensí ku bou di su guia e sektor turístiko di
Boneiru lo sigui prosperá i sigui desaroyá gradualmente.