Prestashon turístiko mensual na Boneiru – Resultado preliminar
E resultado preliminar pa luna di sèptèmber 2023 ta duna un indikashon di 11.928 bishitante stayover na Boneiru. Ku 11.928 bishitante stayover durante e luna akí Boneiru ta mustra un tendensia kresiente den e kantidat di turista. Esaki ta nifiká un oumento di 0,7% kompará ku 11.853 bishitante na luna di sèptèmber 2022 i un kresementu konsiderabel di 19,3% kompará ku 10.000 bishitante na luna di sèptèmber 2019 (promé ku e pandemia).
E merkadonan di orígen mas importante pa turismo na Boneiru ta keda konsistente, kaminda ku Hulanda i Merka ta kana dilanti. E kantidat di bishitante hulandes tabata 5769 (48%), miéntras ku Merka na luna di sèptèmber 2023 a kontribuí ku 2525 (21%) bishitante stayover.
Kòrsou ta sigui hunga un ròl krusial den e paisahe turístiko di Boneiru ku 1904 (16%) bishitante for di nos isla besiña.
Otro merkadonan importante ku a kontribuí na e éksito turístiko di Boneiru ta entre otro Aruba, Alemania, Bélgika, Canada, Reino Uní, Colombia i Suisa.
Den luna di sèptèmber 2023 Alemania a bini dilanti komo un merkado fuerte, ku 271 bishitante stayover registrá. Esaki ta pone Alemania riba e lista di merkado ku a presta mas mihó pa luna di sèptèmber.
Pa loke ta trata demografia di e bishitantenan, e kategoria di edat di 45 te 54 aña ta keda esun mas komun serka e bishitantenan, loke ta enfatisá Boneiru su forsa di atrakshon riba biahero adulto ku ta en buska di un variedat amplio di eksperensia.
Ora nos analisá merkado merikano mas aleu, e estadonan mas importante for di kua bishitante ta bini ta Florida, California, Texas, New York, Colorado, Pennsylvania, North Carolina, Virginia, Georgia i New Jersey.
E regionnan mas importante di orígen di bishitantenan hulandes tabata e provinsianan parti nort i parti sùit di Hulanda, kaminda Noord-Brabant ta sobresalí.
Banda di esaki turismo krusero na Boneiru a kontribuí ku 19.747 bishitante krusero ku a yega den luna di ougùstùs, danki na presensia di kuater barku krusero durante e luna ei.
Pa estadístika i informashon mas detayá tokante prestashon turístiko di Boneiru, bo por bishitá nos wèpsait ofisial riba www.bonaireisland.com òf manda un email na info@bonaireisland.com.