Firmamentu di un akuerdo di kolaborashon i merkadeo konhunto
Ku orguyo Tourism Corporation Bonaire (TCB) ta anunsiá su akuerdo duradero di kolaborashon i merkadeo ku e artista lokal i strea internashonal Irgwin Sluis, mihó konosí komo Ir Sais.
Riba 8 di febrüari 2022 TCB a firma e akuerdo di merkadeo ku e artista lokal Ir Sais i a rekonos’é tambe komo Embahador di Boneiru. E akuerdo ku nan a firma ta un kolaborashon duradero riba término largu ku komo meta pa promové nos isla Boneiru pa medio di músika i nos tradishonnan kultural lokal. Firmamentu di e akuerdo a tuma lugá na Rancho Gran Chaparal, un lokalidat kultural importante na nos isla.
‘Nos ta enormemente entusiasmá ku e kolaborashon akí. Personalmente mi ta mira esaki tambe komo un rekonosementu pa e trabou duru i dedikashon di Ir Sais. Boneiru ta orguyoso di su prestashonnan i e dia di awe ta marka un kapítulo nobo kaminda nos por kompartí nos patrimonio lokal, nos músika i nos manera di biba ku mundu. Aktualmente TCB ta trahando riba un proyekto nobo di ‘rebranding’ ku komo título “Reposishonamentu di Boneiru den harmonia ku naturalesa i nos hendenan”, kaminda músika i nos tradishonnan kultural ta hunga un ròl klave pa loke ta trata nos esfuersonan riba tereno di komunikashon’, segun Miles Mercera, direktor di TCB.
Ir Sais a agregá: ‘Pa mi ta un honor pa kolaborá ku mi isla, haña rekonosementu pa mi talento i alabes forma parti di e proseso pa duna Boneiru mas popularidat.’
