Dia 6 di desèmber 2023, Tourism Corporation Bonaire (TCB), den kolaborashon ku Entidat Públiko Boneiru, Bonaire International Airport (BIA), Bonaire Hotel and Tourism Association (BONHATA) i Ofisina di Haf a kordiná e konferensia di prensa konhunto di fin di aña na bordo di e barku krusero Rhapsody of the Seas.
E visepresidente di Royal Caribbean Latino Amerika i Karibe, Alberto Muñoz a duna un palabra di bon biní i a ekspresá su gratitut na Boneiru.
Diputado Clark Abraham a yama bon biní na tur e partnernan i el a kompartí su vishon i su prioridatnan pa aña 2024. Entidat Públiko Boneiru ta bai evaluá diferente asuntu ku tin di haber ku turismo di nobo, manera e maneho di un barku krusero pa dia, impuesto di turista i e pago pa naturalesa, ku komo meta introdukshon di “un solo pago pa destinashon” pa maneho di e destinashon. Maneho di produkto i desaroyo di produkto ta bai forma un parti integral di e vishon turístiko. Entidat Públiko Boneiru lo traha huntu ku tur stakeholder pa hiba un diálogo habrí tokante e hopi desafionan i oportunidatnan ku tin nos dilanti.
Veroesjka de Windt, direktor di BONHATA, a trese dilanti ku na aña 2023 BONHATA a mira ku a bai bèk na e normanan di promé ku e pandemia, ku prestashonnan ku ta keda algu bou di e nivel di aña 2019. E grado di okupashon promedio te ku luna di novèmber 2023 tabata 61%, un bahada di respektivamente 5% i 6% kompará ku aña 2022 i 2019. E di dos mitar di aña 2021 tabata e kuartal ku a presta mas mihó na Boneiru, loke por kontribuí na e eskoho limitá pa loke ta trata destinashon. No opstante un okupashon stabil na aña 2022 i un bahada leve na aña 2023, e tarifa pa dia promedio (ADR) tabata $219, un oumento di 9% kompará ku aña 2019, pero un bahada di 1% kompará ku aña 2022. E RevPar, esta e entrada pa kada kamber disponibel, te ku luna di novèmber 2023 tabata $129, un oumento di 3% kompará ku aña 2019, pero ku un bahada di 4% kompará ku aña 2022. E retonan ta entre otro gastunan empresarial mas haltu, kantidat di buelo limitá i invershon abou den e produkto turístiko. BONHATA ta sigui hasi esfuerso pa atendé konhuntamente ku e retonan akí pa garantisá un kresementu duradero di sektor turístiko na Boneiru.
Maarten van der Scheer, direktor di BIA a bisa: “Na aña 2023 Aeropuerto Flamingo a pasa den un kresementu modesto, ku algun sgùifmentu grandi entre e segmentonan. Despues di un oumento grandi den sifra na aña 2022, merkado hulandes a rashonalisá ku ménos kapasidat na aña 2023. Merkado norteamerikano tabata stabil i lo konosé un kresementu den wenter di 2023-2024, komo konsekuensia di e inisio binidero di buelo nobo di WestJet pa Toronto, e buelonan di United Airlines pa Newark ku ta bira tres biaha mas tantu i un prestashon fuerte di Delta pa Atlanta. Tráfiko aéreo entre e islanan a mira un oumento grandi komo konsekuensia di buelonan èkstra di Divi Divi i EZAir i komienso di buelo di Winair pa Kòrsou i Sint Maarten. Aeropuerto Flamingo ta spera di sera aña ku 435.000 te 440.000 pasahero. Entretantu nos ta sigui mehorá nos fasilidatnan pa medio di por ehèmpel kaba ku e karusèl pa transporte di maleta den sala di yegada i traha un kapa pa tapa solo i awaseru pa pasaheronan ku ta yega nos isla.”
Ofisina di Haf a presentá e estadístikanan krusero di mas resiente, for di kua ta resultá ku na luna di òktober nos a haña bishita di kuater barku krusero, ku a trese 13.062 bishitante. Luna di novèmber a mustra un oumento ku 17 barku krusero i 34.003 bishitante, miéntras na luna di desèmber segun espektativa lo yama bon biní na 32 barku krusero, ku segun kalkulashon lo trese 80.000 te 90.000. For di luna di yanüari te ku novèmber di aña 2023 nos isla a yama bon biní na 143 barku krusero, ku 388.185 bishitante. E pronóstikonan pa henter aña ta indiká ku 175 barku krusero lo a bishitá nos isla, ku un total antisipá di mas òf ménos 470.000 bishitante.
Miles Mercera, direktor di TCB, a kompartí resultadonan preliminar, for di kua a resultá ku na luna di novèmber 2023, Boneiru a yama bon biní na 13.910 bishitante stayover. Te ku awor (yanüari te ku novèmber) den aña 2023 Boneiru a yama bon biní na en total 153.501 bishitante stayover, loke ta surpasá e sifranan pa e mesun periodo na aña 2019 (142.900) i na aña 2022 (152.100). Durante aña 2023 TCB a partisipá aktivamente na i a organisá diferente evento, entre otro Annual Tourism Summit, Bonaire International Tourism Conference, DEMA Show, Travel Awards na Brussel i e evento di aniversario di TUI. Banda di esaki TCB eksitosamente a ehekutá vários proyekto, manera e Proyekto di Inovashon di Turismo, e Proyekto di Señalisashon, Ofisina di Informashon pa Turista i e tualètnan públiko. Mirando padilanti den direkshon di aña 2024 ta verwagt un oumento leve den e promé kuartal, loke ta un konsekuensia di e buelonan ku a keda ampliá di parti di diferente kompania aéreo for di Merka i e oferta adishonal di asiento di e kompanianan aéreo entre nos islanan.
Pa mas informashon, manda un email na marketing@bonaireisland.com.
