Ku orguyo Tourism Corporation Bonaire (TCB) a
organisá un evento spesial di despedida i gradisimentu pa Ruby Pouchet, ku ta bai
representá Boneiru na e sertámen di Miss Universe 2024, ku ta tuma lugá na Mexico City.
Esaki ta un momentu históriko pa Boneiru, pa motibu ku despues di un ousensia di 25
aña Boneiru ta bèk riba esenario di Miss Universe.
E evento ku nan a tene resientemente, tabata un oportunidat pa TCB i pa henter
komunidat boneriano ekspresá nan gratitut na Ruby su spònsernan, ku a hasi su biahe
posibel ku nan sosten generoso. Un danki spesial ta bai na nos spònsernan apresiá:
Tourism Corporation Bonaire, Entidat Públiko Boneiru, Bonaire Travel, Van der Valk
Plaza Beach & Dive Resort, Sebastian’s, WEB, Fundashon Wega di Number Boneiru,
Massive Production, Pier Dos, Hype Events, Changes, Wilca, Best Cellars, Blendr,
Energia TV, Essence, Sandra’s Fashion, Bon Laser, Elegance Spa i Integral Aesthetic
Center.
Nan sosten a hasi posibel ku Ruby por hasi e biahe inkreibel akí i pone Boneiru un biaha
mas riba mapa internashonal.
Ruby Pouchet ta embarká riba e aventura eksitante akí ku un seri di biahe internashonal
pa su último preparashonnan. Promé ku e bai Mexico City, e ta biaha pa Venezuela,
Mexico, Miami i Houston, Texas. Akinan e ta finalisá su trahe nashonal i su trahe di anochi,
i e ta prepará su mes pa orguyosamente mustra Boneiru su kultura i bunitesa riba
esenario mundial.
E di 73 edishon di Miss Universe ta konsistí di e presentashonnan preliminar i e
kompetensia di trahe nashonal dia 14 di novèmber. E show final ta tuma lugá dia 16 di
novèmber, kaminda Ruby ta bai kompetí kontra partisipantenan for di henter mundu.
Tourism Corporation Bonaire ta manda su mihó deseonan pa Ruby, na momentu ku e ta
representá nos isla ku elegansia, konfiansa propio i orguyo. Su partisipashon ta un logro
pa Boneiru i nos ta entusiasmá pa enkurashá i aploudí Ruby ora ku e ta kompetiendo na
Miss Universe 2024.
Nos ta invitá henter komunidat boneriano pa huntu ku nos apoyá Ruby durante e biahe
akí i pa keda na altura di tur aktualisashon na momentu ku e ta skirbiendo historia pa
Boneiru.
