Promé ku e kompetensia a kuminsá, señor Ethuriel Nicolaas, sekretario i na nòmber di diréktiva di Tirabon a yama tur presente un bonbiní, i el a splika e parkour. Tambe el a informá tokante e parti di puntuahe i reglanan. Seguidamente el a pasa palabra pa Jadyr, funsionario di seguridat na kancha ku a hasi e asina yamá “veiligheidsbriefing” obligatorio. Manera kustumber promé ku ta atendé ku arma, mester splika kiko tur por i ku mester tene kuenta kuné rondó di deporte di tiru.
E reglanan ékstrikto di seguridat ta di sumo importansia rondó di e deporte di Tiru kaminda ku ta atendé ku arma. Un arma, bo ta trat’é sèmper komo se fuera ku e ta harmá. Arma no ta algu pa hasi wega kuné. Seguridat mester keda haltu den bandera tur ora i na tur momentu ora ta atendé ku arma. palabranan di Jadyr na presentenan. Después ku Jadyr a informá partisipantenan tokante di e reglanan di seguridat e kompetensia a ranka sali.
Pa loke ta e kompetensia, esaki tabata unu riba nivel IPSC. IPSC ta pará pa, “International Practical Shooting Confederation”. IPSC ta un disiplina den e deporte di tiru ku ta kresiendo mundiálmente pa e forma ku esaki ta duna oportunidat úniko pa e tiradó por move di un punta pa otro riba kancha, tirando riba diferente tipo di targets. E kompetensia a wòrdu dirigí pa Ethuriel komo komandante di kancha “range officier”.
Seguidamente a pasa over pa e partisipantenan por a registrá nan mes pa nan partisipashon. Ethuriel a habri kancha pa 15:00or i e kompetensia a start. E kaliber ku a skohe e biaha aki tabata kaliber 9mm i tambe .22 largu ku disiplina di pistol.
E parkour tabata konsistí di 6 targets ku tiradónan mester a tira entre otro for di patras di un bentana pa asina purba skor mas tantu punto ku ta posibel. Na di terser lugá a sali Jadyr da Silva Piloto, Thuersten Winklaar a bai ku e premio di segundo lugá i Ethuriel Nicolaas a sali e ganadó apsoluto. Después ku Teressa Anthony (Terry) a anunsiá e skornan tur partisipante a risibí un sertifikado di partisipashon. Premionan tabata, di terser lugá un “gift card”na valor di 50 Dollars pa hasi kompras na un supermarket. Segundo lugá a risibí un ham di pasku i pa e ganadó apsoluto e kalakuna i tambe ku un “voucher” na balor di 100 Dollars di Coral Casino.
Sigur tabata un día plasentero kaminda ku por a mira kon partisipantenan tiradó a sosialisá un ku otro, i den un ambiente ameno a interkambiá un ku otro di ideanan relashoná ku e deporte di tiru. “All by all”, tur presente a pasa un atardi inolvidabel na kancha Arthur Enrique Mauricio. Sin por keda afó tabata tin tambe un tremendo catering, ko’i kome i bebe liber di alkohòl naturalmente.
Partisipantenan tabata; Ethuriel Nicolaas, Jadyr da Silva Piloto, Thuersten Winklaar, Flavio Maestroni, Remsley Anthony, Martien van der Valk, Andy Dobson i tambe Benrick Martis.
Na final di e kompetensia, Ethuriel a hiba palabra gradisiendo tur presente pa nan partisipashon, i el a broma un poko tambe ku su tremendo logro. Otro partisipantenan tambe a hiba palabra di felisitashon pa Ethuriel, i na mes momentu tambe nan a inform’e ku nan ta bai trein i bin bèk duru den e siguiente kompetensia.
Diréktiva di Tirabon kier manda palabranan di apresio i gradisimentu na nos spònsernan ku a sa di kere den Tirabon i asina hasi e kompetensia posibel; Coral casino, Voz di Bonaire, Terry ku Remsley Anthony i tambe Di CHIRI services (Fabi).
