Diferente persona a mustra nan preocupacion na EA News pa loke nan a bin ta tuma nota di dje den bida nocturno. Un situacion unda cu tur hende ta na altura di dje pero no ta haci nada.
Como un funcionario di gobierno, principalmente, bo debernan no ta caba na momento cu bo yega e ultimo di bo shift. E ta bay hopi mas leu. Bo ta 24 ora pa dia y esey ta encera pa tuma nota di tur cos contra ley cu ta tumando luga. Y un di nan ta bagamunderianan cu ta tuma luga principalmente den e barnan Chines cu a plama manera paddestoel rond di Aruba.
Segun un ciudadano a comenta, no ta na un sitio el a tuma nota di bagamunderianan tuma luga. Y ta mira funcionarionan den e bar, sea cu ta sinta dal drinks cu amigo of ta bin busca amiga. Y mientras cu nan ta den e ambiente ey ta imposibel cu nan no ta sinti e holo di marihuana cu ta dal tur hende eyden. E control no mester ta solamente ora cu pasa auto y a haya holo di marihuana ta para esaki. Mester ta mas estricto. Si e funcionario no kier actua e ora ey, saca celular y informa. Cada un hende mester cuminsa actua proactivo pasobra cos lo sali for di man.
E bendedor di marihuana kier sigui bende mas di su producto pa saca mas placa. Algun luna atras a detene un mucha muhe, kende tabata biba un bida di luho, pero tur hende ta haya straño con e por “afford” esey. Pero hende a bon compronde con esaki por tabata posibel ora cu pa puro casualidad a bin atrap’e. E cu su pareha a pleita y a yama polis y para den cushina ta papia cu e muhe aki, polis a mira un lachi habri y sakito manera di marihuana. A bin resulta cu e muhe hoben tabata biba di e negoshi di benta di marihuana y asina e ta saca su ganashi di rond di 10 mil florin pa luna.
Manera e señora ariba menciona tin mas y hopi di nan ta colga rond di barnan, unda clientenan bebi caba ta busca droga of nan ta tenta nan pa purba marihuana of cualkier otro droga.
No solamente droga pero actonan di prostitucion ta tuma luga, sin control di sanidad. Por lo menos esnan di San Nicolas ta registra y nan mester controla tur siman. Pero loke ta tuma luga den e barnan ta ilegal.
Tin un bar conoci pa esaki na Tanki Leendert, unda tin yen muhe bunita trahando, tanto den como di e bar, cu un motibo. Haciendo un señal, ta indicacion pa “ban cama”. Y patras tin espacio cu nan ta uza pa haci sex a cambio di placa, esta prostitucion.
Mescos cu e bar ariba menciona, tin cantidad di otro cu pa nan actividad mas bien ta parce “bordeel”, esta cas di prostitucion. Ta tristo, segun e diferente comentarionan, e adultonan cu ta frecuenta barnan Chines, ta na altura di e situacionnan aki ilegal y “se hacen la vista gordo”, manera ta bisa na Spaño. Tur fin di si siman e barnan aki ta yen, no solamente pa bebe. Tristo ta pa mira cu hasta hobennan ta cay den e trampanan aki di consumi delaster un placa den consumo di alcohol, y sex paga. Door di e prostitucion ilegal aki, ta haya cu hopi mas lihe malesanan venerico ta plama rond. Cifranan ta mustra cu e tipo di malesanan aki ta sigui subi. Mas tristo ta ora cu ta pasa e malesa aki pa casa of pareha, kendenan ta inconsciente di loke ta pasando den e bishita na un bar Chines.
Un cos cu ta lucha y bringa pa consientisacion di muchanan cu ta Sali na estado den un edad hoben, consientisacion di Droga unda FADA ta traha diferente episocionan di consientisacion y di otro banda e adultonan cu mester duna e “BON voorbeeld”,conseho y mester ta un roll model ta netamente haci lo contrario ta mustra cu Aruba ta hibando awa lama gastanto tanto na prevencion y na final ora e ratonnan di anochi Sali ta haci y of causa e danjo , den dia kier ta un bon imagen y cu ta bringa lo contario y of kier mustra lo contrario. Lamentablemente esaki ta un realidad cu Aruba ta bibando bou di e barnan chines ron di Aruba. Lamentablemente e tipo di ilegalidadnan aki lo sigui crece si no tin control y boet ta cay.
