Nos gobierno no sa mas kico pa hasi. Nan a perde tur nocion. Nan luz a paga y nan no tin direccion mas. Nan ta kere cu 3% di indexering ta un gran cos riba e pensioen di nos grandinan. Kico nos grandinan por hasi cu 36 florin extra riba nan pensioen si costo di bida a subi drasticamente e aña aki. Si paisnan grandi ta papia di mas cu 13% di inflacion ta kico nan por cumpra cu 36 florin.
Den september 2022 gobierno ta anuncia adelanta cu gasolin lo baha y ainda e ta keda 2.68 florin pa liter. Dia cu mester anuncia cu prijs ta subi gobierno a warda te cu e ultimo dia pa anuncia cu lo bay tin aumento riba prijs di gasolin. E prijs di gasolin ainda ta hopi halto. Un maneho sin pia ni cabez cu ta mustra saltonan mortal paso no sa mas kiko mester hasi.
A gaba cu Eagle LNG y diripente awor Utilities kier bin cu Molina di biento mientras cu esey no ta tarea di Utilities. Riba dje kier bin cu un otro contract secreto pa pueblo. Kier hasi uso di patrimonio di pueblo y kier tin secreto pa pueblo. Nos tin un WEB NV cu ta den problema financiero paso ta gobierno a tarda pa hedge y a tarda pa ahusta e tarifa di awa y electricidad. Despues di mal maneho di gobierno riba dje ta castiga pueblo cu aumento di tarifa y kier hasi cosnan scondi. Esaki berdaderamente ta un gobierno comunista cu gaña di ta carne pero e ta un lobo cu kier destrui tur locual ta bon.
Informacion cu nos partido Curpa tin cu gobierno ta crea departamentonan den Elmar y Web pa hinca nan simpatisantenan aden. E movecion nan aki ta muestra cu poco poco e rosea di e gobierno aki ta cabando. Esaki lo ta fin di e gabinete aki tambe. Sigur ta bai tin grito pio cu velorio paso e bida dushi ta caba.
Riba tur terreno e gobierno aki a crea problema pa su mes. A tene e werksternan mas cu un aña na linea pa despues di puñalanan y hisa nan benta den scochi di SKOA y minister a laba man. Scol rond Aruba no a wordo manteni y scolnan ta para sin a wordo renoba. Riba dje kier economisa riba nos enseñansa, pero si tin placa pa regala CITGO, pa cende meche y pa auto caro. Pa fiesta tin placa pero unda tin necesidad no tin placa.
Nos salud mental ta den problema serio pero no tin placa pa salud. Nos hendenan cu salud mental ta bay riba caya paso ta papia bunita pero no ta cumpli. Gobierno ta sigui hunga cu salud di nos pueblo. Salud di nos pueblo ta un cuido y no un negoshi. Cuido bo mester paga p’e y no manehe manera un negoshi. Saludo di nos pueblo no por hunga cu’ne.
Mesun cos ta conta cu seguridad. Bo no por saca beneficio di seguridad sin inverti. Awe nos por mira cu a baha overtime den polis drasticamente. Gobiernonan for di 2008 te cu awe a bin ta baha gasto riba nos cuerpo politicial y otro departmentonan cu falta di personal. Un maneho sin pia sin cabez. E baca a hoga caba y esaki ta e momento gobierno lo bay paga pa tur inhusticia comete contra di pueblo. Tur producto tin un fecha cu nan ta caduca. E producto cu ta e coalicion aki tambe tin fecha cu e ta caduca.
Un gobierno cu un curason cu ta lew for di Dios no tin solucion. Un tempo pa nos bin cu un gobierno cu ta honra Dios pa nos pueblo por biba den paz y trankilidad. Asina so nos pueblo lo bay dilanti. Locual cu Dios bendiciona no tin ningun hende riba e mundo aki cu por maldicione.