E tim ku aktualmente ta trahando riba e vershon final di Plan Maestro Boneiru 2030 a disidí pa posponé e presentashon un tiki mas ainda.
“ E limitashonnan den e tempu di corona aki a stroba nos mas tantu ku nos por a pensa ora nos a anunsiá ku nos ta bai lansa e Plan Maestro dia 6 di novèmber. Nos a konstatá ku komo konsekuensia di obligatoriamente kanselá sierto seshonnan, no a profundisá sufisientemente den algun tópiko di manera ku ta difísil pa hasi e totalidat integral komprendibel. Nos tin ku mir’é komo un pùzel grandi di sentenares di pida chikitu. Ta te ora ku bo ta serka kla bo ta deskubrí si ainda falta algun pida. Na e momentunan aki e plan no ta sufisientemente ‘hechu’ ainda pa presentá na pueblo ”, segun e tim di Plan Maestro.
A tuma e desishon pa posponementu despues di konsulta ku Kolegio Ehekutivo, outor di e plan i ministerio di Asuntunan Interno i Relashonnan den Reino. “ Tur hende ta di akuerdo ku kalidat ta promé ku rapides. E Plan Maestro mester ta sufisientemente bon pa bai 10 aña largu kuné, pues ora nos presentá e vershon final nos ke pa nos por para 100% su tras.” Asina ku tin mas klaridat tokante esei, nos lo anunsiá un fecha nobo.
