ORANJESTAD,Aruba
Tienda di Educacion (TdE) kier anuncia cu entrante 1 di mei 2020 e organisacion lo conoce un cambio den forma di un director nobo den persona di sr. Rhomyko Winklaar.
Tienda di Educacion ta e organisacion pa Mama, Tata, Wela, Welo, Madrastra, Padrastro y tur otro persona cu directo of indirecto tin di haber cu cuido y guia di mucha y hoben di 0 pa 18 aña.
Si bo tin cualkier pregunta, bo ta sinti e necesidad pa papia, e necesidad pa un profesional scuchabo, duna bo sosten y conseho tocante educacion di mucha of hoben; NO DUDA, YAMA 161!
–Educa, lanta un mucha, apesar cu nos ta haci esaki tur dia, e no ta facil pero cu amor, guia y sosten necesario sigur huntu nos ta logra-
Sra. Corina Linssen tabata dirigi Tienda di Educacion desde aña 2013. Durante aña e organisacion aki a crece y haya su identidad den nos comunidad, esaki danki na sra. Linssen y e team.
Directiva ta gradici sra. Linssen pa tur e añanan di servicio incansabel na e fundacion y alabes kier desee tur clase di exito cu su reto nobo.
Sr. Rhomyko Winklaar a tuma e reto di dirigi Tienda di Educacion door di su pasion pa bienestar y desaroyo di nos muchanan, mayornan, educadornan y tur esnan cu di un of otro manera ta forma parti di educacion diario di un mucha.
Tienda di Educacion den su forma di duna servicio ta brinda e oportunidad pa por haci un diferencia door di concientisa y sostene educadornan den preguntanan cu nan cu por tin.
Banda di esaki, sr. Winklaar a elabora riba e contribucion di su experticio como trahador social masculino y e importancia di un mayor den bida di cada mucha cual ta haci un diferencia den protecion di nan educacion. E factornan aki tabata estimulo pa sr. Winklaar sigui cu su vision profesional y join e organisacion di Tienda di Educacion desde 1 mei venidero.
Sr. Winklaar su mensahe pa comunidad ta: “Cu pasion y dedicacion, hunto manera un comunidad uni, nos lo por logra hopi”.
Directiva di Tienda di Educacion ta desea sr. Rhomyko Winklaar tur clase di exito cu e reto aki.
Por comunica cu Tienda di Educacion via number di telefon 161, via pagina di facebook Tienda di Educacion y tambe via email: info@tdearuba.com.
E organisacion ta situa na su localidad nobo na Sabana Blanco 68-C.
