Shete miembronan di e team di Hilton Aruba Caribbean Resort & Casino, jong den curason, recientemente a bay pa pension. Nan a wordo presenta cu bouqet di flor fresco, cartanan di aprecio y regalonan na un encuentro chikito cu distanciamento social na Mira Solo Bar, den presencia di gerencia di nan departamento, Glenn Farro, Director di Recursonan Humano, y Vasco Baselli, General Manager.
Ambos Farro y Baselli a agradeci e miembronan pensionado y desea nan exito riba nan caminda y aventura nobo di pensionado pa disfruta e fruto di nan labor, yiunan y nietonan, nan iglesia y hobbies.
Baselli a papia den nomber di hentr e team. “Mi lo kier expresa nos gratitud sincero pa e trabao duro y profesionalismo cu boso a demostra durante ultimo añanan na nos estimado hotel,” el a bisa. “Bo compromiso y dedicacion semper tabata un inspiracion pa boso coleganan, supervisors y managers, kende sigur lo haya falta di traha cu boso. Durante boso tempo na nos hotel bo a biba diferente cambio y retonan y semper a sobresali y surpasa expectacionnan di nos bishitantenan. Boso ta representa loke semper a defini e resort aki, e hospitalidad caluroso y autentico di nos team. Awor cu bo ta cuminsa un etapa nobo den bida, nos ta duna bo pabien, y nos ta desea di extende un Masha Danki pa un trabao bon haci, for di noscurason.”
Miembronan di e team cu a bay pa pension ta inclui Elfried Desidero Mercera, 13 aña di servicio, Sylvia Merlin Wilson Carti, 16 aña di servicio, Melania Salome Wolff, 17 aña di servicio, Josetta Petit Frere, 23 aña di servicio, Jeannine Poulard, 25 aña di servicio, Bienvenida Angelita Lopez Tavarez Cabrera, 28 aña di servicio, y Glenda Maria Tromp, 32 aña di servicio.
Den total 154 aña di experiencia valioso a wordo retira e dia ey, anto e resort ta asina exitoso manera cu e ta, cu Aruba asina popular manera cu e ta, danki na esfuersonan di su hendenan, kende a pasa varios ora tur dia, leu for di nan famianan y amigonan, pa yuda Aruba su economia bay dilanti.
Algun di e pensionadonan a yega e evento cu nan nietonan y saca potret pa recuerdo hunto cu nan hefenan di e resort su team di gerencia. Executive Chef Matt Boland, Director di Front Services
Nelson Winklaar, y Executive Housekeeper Bibi Ohab.
Den e imagen aki, por mira e encuentro ameno cu bebidanan y hors d’oeuvres mientras cu Hilton a despedi di nan seniors.
