E ex-presidente y filosofo José Mujica a yega di bisa: “En el fondo no hay derrota…. sólo sufren la derrota aquellos que dejan de luchar”. Den preparacion pa e siguiente eleccion y den combersacion cu varios persona y posibel candidatonan pa UPP, loke ta resalta ta e situacion precario cu Aruba ta aden, e entrega di nos soberania politico, e presencia directo di un COHO maneha pa Hulandesnan cu ta responde na Den Haag y e desconfiansa grandi cu tin den nos politiconan y politica na Aruba. Esakinan e.o. ta obstaculonan grandi cu ta haci cu tin personanan tin duda pa ta politicamente activo. For di algun tambe mi a haya observacion tocante e percepcion cu tin eyfo riba mi persona. Sigur cosnan cu tambe ta tuma nota di dje, particularmente ora argumentacion a caba of contrincantenan fanatico simplemente ta purba di desbarata mi opinion of criticanan dor di bay over na comenta riba ki clase di politico lo mi ta.
Mi ta consciente, cu ultimo aki kizas ta pone cu tin hende lo tin reserva pa uni nan mes na UPP y ta p’esey mi a tuma e decision pa atende publicamente e alegacionan cu constantemente ta wordo haci contra mi persona. Di e manera aki mi ta trata di atende cu e “ELEPHANT IN THE ROOM”, mirando cu persona ta wordo considera un persona controversial y problematico. Un politico cu boca grandi, cu a falsifica diploma, a bringa dunadornan di cuido y a hiba un maneho pesimo den Dimas. Tambe cu mi ta un “gepasseerd station” y ki mishi mi ta habri mi boca y critica otro di corupto si mi mes ta culpabel di a haci actonan corupto den pasado. Por ultimo cu mi ta carga un vengansa grandi contra MEP.
“MEA CULPA”
Mi ta admiti cu mi lo por a demonstra un comportacion mas ehemplar durante mi carera politico. No tur ora mi por bisa cu mi ta orguyoso di esaki y ni pretende di tabata perfecto. Sin duda, mi tin mi debilidadnan, mi erornan y mi berdadnan. Ta un hecho cu mi boca ta grandi y cu mi a falsifica diploma. Cu mi lo por a hiba un mihor maneho di loke mi a haci!
UN MANEHO RESPONSABEL Y TRANSPARENTE!
Den ehecucion di mi maneho como mandatario, mi a trata na percura pa ta responsabel y transparente. Semper mi a percura pa mi maneho a carga sosten di e gobierno y di mayoria den Parlamento, y di e partido cu mi a forma parti di dje.
E maneho por ehempel di Dimas tabata dirigi pa sirbi na prome lugar e Arubiano y despues esnan cu ta huespednan temporario riba nos Isla. Mi maneho pa cu AZV no tabata uno populista. Mi a logra e obhetivo di e gobierno pa baha e “vet” cu tabata tin den AZV, sin mishi cu e pakete. Mi ta admiti mi errornan, pero loke mi no por wordo culpa di dje ta cu mi ta corupto. Investigacionnan tanto di OM como esun cu Mike Eman a laga haci door di WODC, no a haya ningun indicacion “whatsoever” di corupcion door di mi persona, sin papia mes di e 8 casonan entorno Bouldin & Lawson cu ta bisa todo lo contrario!
FUTURO DI UPP.
Ta logico cu mi salida na 2011 for di e partido geel a hacimi hopi dolor! Pero mirando e rumbo cu nos pais tabata bayendo na e momentonan ey, a pone cu mi no por a stop cu e lucha pa defende interes di pueblo.
Esnan cu ta sigui publicacionan di UPP den medionan di comunicacion lo a ripara cu nos ta cuestiona e partidonan cu a forma gobierno e ultimo dies aña, pues geel y berde, pa motibo di mal gobernacion y NO pa motibo di venganza.E hechonan aki ta e “REAL ELEPHANT IN THE ROOM” cu nos kier a laga mira luz di dia.
E hecho cu mi tin 67 aña no ta strobami pa sigui cu un lucha y aporta constructivamente na desaroyo di mi PATRIA y manera e frase famoso di Mujica ta bisa: e derota t’ey cerca esnan cu stop di lucha. Pa mi, despues di dies añanan di mal gobernacion, resultando den entrega di nos soberania como pueblo, tabata e momento di tuma un pausa, reflexiona y asina “reset” mi mes. Pa die manera aki, hunto cu tur esnan cu ta comparti e deseo di UPP, start sali bay den e lucha pa recobra loke a wordo entrega, pa nos reforma nos pais y su institutonan, pa nos como Aruba den algun tempo por tin nos soberania bek.
Pesey, e LUCHA hunto cu e team di UPP, sperando cu pueblo no husga solamente mi pasado, pero ta habri pa duna mi persona y UPP e oportunidad pa percura pa “UN MANECE NOBO PA ARUBA” pa medio di REBOOT 2.0.
