Universidad di Aruba ta brinda diferente estudio, un di e estudionan aki ta Organization, Governance and Management (OGM). E estudio ta prepara studiante pa bira manager, researcher, consultant of consehero, sea den sector publico of priva. E studiantenan tin e oportunidad pa investiga organisacionnan local cu un base teoretico. Durante un conversacion cu Keila Heyer, un graduado OGM, el a splica pakico tabata un bon decision pa studia OGM.
Actualmente Keila ta traha den e departamento di Recurso Humano na Nagico como ‘Human Resource Generalist’. El a gradua di Universidad di Aruba na 2016 y ta splica cu el a scohe pa atende Universidad di Aruba pa motibo cu e no tabata kier a laga su famia na Aruba. Prome cu el a sigui e estudio di OGM, el a sigui e estudio di Ley. El a scohe OGM pa motibo cu e ta un estudio cu variacion y studiantenan ta siña un tiki di diferente topico, pa cual despues nan por profundisa nan mes mas den e area cu ta atrae nan. Pa Keila e topico aki tabata Recurso Humano, cual ta un di e diferente cursonan cu studiantenan ta haya chens pa sigui den nan di dos aña di OGM. Critical Thinking ta un curso cu tambe e resalta, Keila ta splica “E ta siña bo con pa pensa mas leu di locual ta presenta bo dilanti y den un manera of otro e ta siña bo cu no ta tur ora mester reacciona di biaha, pero analisa y warda na debido tempo pa reacciona”. Keila ta haya cu e decision pa haci e estudio di OGM ta un bon decision, e estudio ta acredita y el a haya e oportunidad di studia diferente topico cu ta yud’e den su bida profesional y personal. Na aña 2017 e Nederlands-Vlaamse Accreditatieorganisatie (NVAO) a duna OGM un conseho positivo. Esaki ta algo cu Keila ta splica cu tabata un preocupacion mientras e tabata sigui e estudio ya cu no tabata tin mucho seguridad si Aruba lo reconoce e diploma. NVAO e acredita OGM riba un nivel di WO y duna graduadonan e chens pa sigui nan estudio afo y haya trabou facilmente. Keila ta bisa un di e estudio su fortalezanan ta cu e ta saca bo for di bo ‘comfort zone’, studiantenan no ta keda den buki y mester bay den practica pa wak con nan como persona y nan conocemento lo por yuda un organisacion. E ta ponebo siña pa comunica riba nivel halto y preparabo pa papia den publico, Keila a splica. Esaki a prepara Keila pa ta sigur di su mes como persona, analisa structura y cultura di trabou, y alavez trece su opinion dilanti den un manera profesional.
Keila ta conseha tur esnan interesa den OGM pa lesa informacion online y atende Open House pa haya e oportunidad di papia cu studiantenan actual y docentenan. E siguiente Open House lo tuma lugar virtualmente esta ‘Virtual Open Day’ dia 5 di November 2020 (diahuebs) di 5.45pm pa 8.30pm. Registra pa asina bo por atende y ricibi mas informacion tocante e programanan cu Universidad di Aruba ta ofrece.
Pa mas informacion riba e estudio OGM, bishita e website di Universidad di Aruba na http://www.ua.aw/OGM y e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/